Bicol newspaper | Bicol Standard | Get Bicol news about the Bicol region: Naga City, Camarines Sur, Albay, Legazpi City, Masbate, Sorsogon, Camarines Norte and Catanduanes.

Wednesday, October 19, 2016

Buhi asin Bato lakes, nagsapo nin fish kill

BUHI, Camarines Sur October 19, 2016 (Bicol Standard) – Tulong barangay sa banwaan digdi an nagsasapo ngonian nin lagdoan na pagkagaradan kan mga sira huli kan pagbaba kan supply kan oxygen sa tubig na nagpoon kan sarong aldaw.

Photo via Nonie Enolva
Ini an sabi ni Nonie Enolva, an parataram kan Bureau of Fisheries and Aquatic Resources (BFAR) sa Bicol.

An mayormenteng tinamaan kan problema iyo an mga sira sa barangay kan Iraya, Tambo asin Cabatuan.

Afuera kaini, nanotaran ngonian na aldaw na nagpoon na man an pagkagaradan kan tubig sa Bato Lake.

Huli kan siring na pangyayari nagbulasok nang entero an presyo kan sira sa tabang, orog na an tilapia, na inaataman sa duwang mga banwaan.

An presyo ngonian kan kada kilo nin tilapia nag-aabot na sana sa P10 hasta P20, asin parateng nagkukuli-kuli pa an mga parabakal.

Base sa report ngonian na aga, orog pang naghiwas an mga lugar na naheling na nagraralataw asin nagkakagaradan an mga tilapia.

Pighahaditan kan mga residentes kan sinambit na mga lugar ta pwedeng magcausa nin mas dakulang problema sa saindang negosyo asin orog na sa salud kan mga tawo.

Mientrastanto, report kan BFAR sa Bicol, lampas sa P4 milyones an danyos sa mga fish cages sa Buhi.

An hiwas kan danyos sa Lake Bato an pig-aaram pa sana ngonian.

Sabi sa paliwanag ni Enolva, an causa kan pagkagaradan kan mga sira iyo an inaapod na “upwelling” kan tubig hale sa irarom kan tubig.

May posibilidad na arog kan enot an fish kill nangyari huli sa pag lataw kan kulang nang oxygen na tubig kan danao nin huli sa maati asin mahibog nang tambak nin mga bahog nin sira na nagtundag sa irarom kan mga fish cages.

Sabi pa ni Enolva may plano ngonian an saindang opisina na magdistribuir nin mga fingerlings nin sira para mahipnoan an mga nagkagaradan na sira sa danao.
Share:

Featured Post

Drug lab query continues

Committee on Dangerous Drugs points to more inconsistencies VIRAC, Catanduanes 2/27/17 (Bicol Standard)—The House Committee on Dange...