Monday, October 10, 2016

Bibliya na nakasurat sa lengwaheng Rinconada, piglansar

IRIGA CITY, Camarines Sur--Piglunsar sadi ku Sabado su Bagong Tipan ka Bibliya sa lengwaheng Rinconada-Bikol matapos a aros walong taon na pagaandam.


“Mabusisi talagang trabaho adi na nagtataong kaulugan sa buway ka mga tawo sa Rinconada ta ngowan naisurat na lengwahe nira,” sabi ni Emy Ballenas, project director ka Rinconada Translation Project, ag miembro ka Translators Association of the Philippines na kaiba man kan One Book Canada, Summer Institute of Linguistics ag a Philippine Bible Society amo nagsuporta ka proyekto.

Segun ki Ballenas, nagpoon a proyekto ku 2004 alagad pinundo ngona di ku mabasa ku bagyong Reming ku 2006 su mga sinurat nira.

“Kinakaipuwan namong mag-otro magpoon sa pag-anap sa mga translators, pagensayo sa linguistics ag cultural anthropology,” sabi ni Ballenas.

Sinabi niya na a manongod sa ortograpiya o paged-ede ka mga ngangabilon ag a pagpili ka ngangabilon na taga-Iriga bilang gagamiton na lengwahe.

“Pirmeng agko politikang inbuelto a ortograpiya alagad pakatapos ka mga konsultasyon ag desisyon ku komunidad na pigirongog namo, pinili namo a ngangabilon ka Iriga por medyo ta amo man adi aros kapitolyo ag sentro ka distrito,”sabi pa niya.

A Rinconada lengwahe ka aros kabanga sa milyon na abitante ka ika-limang distrito ka Camarines Sur na kompuesto ka Ciudad ka Iriga, banwaan ka Bula, Baao, Buhi, Bato, Balatan ag Nabua.

Kaiba sa mga nagngangabil kadi si Sen. Leila de Lima, Nora Aunor, dating Senador Eddie Ilarde, mga artistang sira Jimmy Fabregas ag Rez Cortes, su dipuntong Senador Joker Arroyo ag Miss Universe runner-up Venus Raj.

Mientras tanto, ginibo subago su motorcade sa palibot ka sentro ka syudad sa pagselebrar ka Bible Day sa Iriga.

Pigdeklara ka gobyerno lokal ka syudad a Oktubre 10 kada taon bilang Bible Day katakod man ka Character City program kadi.

Su motorcade pigpartisiparan sa manlaen-alen na sekta ag relihiyon. (Frank Penones Jr.)
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...