3ng personas tiklo mantang nasa pot session sa Naga City

NAGA CITY October 20, 2016 (Bicol Standard) – Apisar kan mayong huraw na paglapigot kan mga awtoridad  na talagang mapoho na an pag-gamit asin paglakop kan illegal na droga, nagdadanay pa guiraray ini sagkod ngonian, digdi.



Sabi mismo kan pulis, kan Martes (Oct 18), alas 8:30 nin bangui, tulong taga Brgy. Triangulo, an 2 mga menor de edad, an tinuklo kan 2ng mga  Brgy. Tanod mantang nasa kasiraman paghigop kan aso kan ipigpapangalad na marijuana.

Nangyari ini sa Zone 5 kan Brgy. Triangulo.

Pigbisto kan mga awtoridad an mga nadakop na iyo sinda: Nicole Albert Quiozon y Nopia asin duwang menor de edad na mga lalaki.

An mga nagdakop sainda iyo sinda Marvin Requillas asin Armando Farol, parehong mga Brgy. Tanod kan Brgy. Triangulo.

Nagluluwas sa report na an mga residentes na mismo kan barangay an nagpaabot kan sumbong sa mga awtoridad.

Mientrastanto, nagluluwas na kan magabot an mga brgy tanod, naheling mismo si Nicole Albert Quiozon na may ibinatikal na kinoromo-komo na papel na pig palibotan nin packaging tape.

Kan rekisahon an laog kan papel, nadiskubre na may laog nin pigtutubodad na pinaalang na dahon nin marijuana, na may mga bunga na.

An mga nadakop na persona sasangatan nin kasong pagbalga kan ley dapit sa illegal na droga.

Sa ibong na lado si Quiozon ilinaog sa detention cell kan Police Station # 2, mantang an mga menor de edad dinara sa Naga City Children’s Home, sa Brgy. Pacol, digdi.

Si nakuang marijuana dinara sa Camarines Sur Provincial Crime Laboratory Office para examinon pa.

Start typing and press Enter to search