Thursday, September 1, 2016

Tanod na nagsaway sa nag-iiwal na mga lalaki, tinaga sa liog, tigbak

LABO, Camarines Norte September 1, 2016 (Bicol Standard) –Gadan na siya. Ini an deklarasyon kan doctor na nag-asikaso ki Melencio Pacinos y Dacillo, sarong tanod sa Brgy. Matanlang, sa banwaan na ini, na tinaga sa liog, mientras na nagsasaway sa duwang nag-iiwal na residentes.



Kan fecha 31 kan Agosto, poco mas o menos alas 12:05 nin mag-omagahon ipinarecord sa pulis an nangyaring incidente.

Sabi sa imbestigasyon si Pacinos nagdulok tanganing magsaway sa nagkakainitan sa diskusyon na sinda Orly Talento y Reyes asin an tugang kan suspechadong si Joel Castillo.

Bilang tanod, mawot kuta kan victima na husayon an duwang nag-iiwal, kan bigla na sanang tagaan an liog ni Pacinol kan suspechado.

Huli sa dakulang lugad sa saiya, pig-aragapan an victima na dinara sa St John Lisazo Hospital, sa Brgy.Gumamela, antes na ibinalyo sa Provincial Hospital kan Camarines Norte.

Afuera kan tama sa liog kan victima, igwa pa siyang nagkapirang lugad sa ibang parte kan saiyang lawas.

Mientrastanto, kan mag-abot sa hospital an lawas kan victima, ipigdeclarar kan mga doctor na mayo na siya nin buhay.

An suspechado marikas na duminulag pasiring sa dae maaraman na lugar.

Hinananap na siya ngonian kan mga awtoridad tanganing pasimbagon sa caso sa paggadan sa victima.
Share:

Featured Post

Drug lab query continues

Committee on Dangerous Drugs points to more inconsistencies VIRAC, Catanduanes 2/27/17 (Bicol Standard)—The House Committee on Dange...