Wednesday, September 7, 2016

Mag-agom, tinaga mantang nagkukugosan kan burat na kainoman sa Vinzons

VINZONS, Camarines Norte Sept 7, 2016 (Bicol Standard) – Mayong herak na tinaga ni Juan Jalimao, residente kan Calangcawan Norte sa banwaan na ini an mag-agom na sinda Almario Almacin y Valeros asin Nora Almacin y Vibar, na parehong nagsapo nin mga lugad sa man laen-laen na parte kan saindang lawas.



Base sa imbestigasyon, poco mas o menos alas 5:35 nin hapon, nag-inoman nin alak an victimang si Almario Almacin asin si Juan Jalimao, sa Sitio Gawadkalinga, Purok I, Brgy. Calangcawan, digdi.

Maogma si enot na parte kan pag-tagay kan victima asin suspechado, kaibahan an saindang mga barkada. Mantang nasa kasiraman kan pag-tungga nin alak, nagmakot an diskusyon ninda Almacin asin Jalimao, na naka-abot sa arangatan, hastang sa surontokan ninda.

Si enot na rangkada kan diskusyon, nasaway sinda kan mga residentes digdi.

Alagad, insistido an suspechado na ipadagos an saindang iwal. Imbes na magpuli sa saindang residencia, si Jalimao nagkua nin sundang sa saindang harong, dangan sinurungan naman si Almacin.

Mientras na nagkaigwa na naman nin comfrontasyon, nagpatahaw an agom ni Almacin na si Nora, asin pigkugos an saindang agom.

An intention ni Nora mapundo na kuta si iwal kan duwa.

Alagad, en vez na matapos an iwal, dinaguso pa lugod ni Jalimao an nagkukugosan na mag-agom, saka pig paratigbas.

Huli kaini, nagsapo nin mga lugad sa saindang lawas an mag-agom na Almacin.

An victima pigbubulong ngonian sa Camarines Norte Provincial Hospital, mantang an suspechado nagdulag, asin dae pa minabutwa hasta ngonian.

An mga pulis nagcoconducir na kan saindang imbestigasyon tanganing magsangat nin caso kontra sa suspechado.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...