Monday, September 5, 2016

Lalaki, nabadil kan pulis sa Virac, gadan

VIRAC, Catanduanes September 5, 2016 (Bicol Standard) -- Nakibadilan sa mga pulis si Mark Agullan Bastida alyas “Galog,” residente kan Brgy. Danicop, digdi sa drug buy-bust operation na nangyari kasoodma.



Sabi sa report, pakatapos na magpabakal nin shabu si Bastida, nagruhab tulos ini palaog sa saindang harong ta naka malesya na mga ahente kan pulis si napabakalan niya.

Bitbit na kan suspechado si markadong cuarta na bayad saiya kan pulis, saka kinua si saiyang badil saka hinimunta si mga awtoridad.

Mayong tinamaan sa lado kan mga pulis.

Sa encontrada ninda, tinamaan nin bala Bastida na naging causa para darahon siya sa Eastern Bicol Medical Center (EBMC).

Afuera kan mga pulis, may mga volunteers hale sa Philippine National Red Cross na nagtabang sa pagdara kan may tama nin baling hawak ni Bastida.

Pag-abot sa hospital, ipigdeclarar na siyang gadan na.

Nakua hale sa pinangyarihan kan incidente an sarong calibre .38ng revolver, 4 na mga bala, sarong capsula, P500 asin an sarong dakulang plastic sachet na may laog nin pigtutubodan na shabu.

Sabi kan pulis, si Bastida an pinaka-primerong tawo digdi na suspechadong imbuelto sa pabakal nin droga na nagadan sa pakilaban sa mga pulis, sa lindong kan Oplan Tokhang.

Mientrastanto, sa intrevista kan BICOL STANDARD ki Catanduanes PNP Provincial Director PSrSupt Jesus Martirez kasubago, sinabi kaini na nagpapadagos an saindang higot na kampanya contra sa ilegal na droga asin iba pang forma nin krimen.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...