No. 1 target sa illegal drugs sa Bula, gadan sa pakibadilan

BULA, Camarines Sur September 15, 2016 (Bicol Standard) -- Si Ernesto Eres y Ordis, na pigbabansagan na “Saudi”, an number 1 sa drug watchlist sa banwaan na ini, binawian na nin buhay.



Si “Saudi,” kaibahan si Marichu Ismael y Bayabay asin Ely Repol y Arpalas, na anas taga Brgy. Bagumbayan, iyo si tuyo kan grupo kan mga pulis na nag-implementar kan Search Warrant sa saindang residencia na firmado ni Judge Timoteo A. Panga Jr., kan Regional Trial Court (RTC) sa Ciudad kan Iriga.

An tulong nasambit na persona kabale sa listahan kan mga inaapod na High Value Targets, en koneksyon kan kampanya kontra sa ilegal na droga.

Base sa report, kan Septiembre 13, alas 9:30 nin banggui, an mga pulis nagduman sa Zone 1, Brgy. Bagumbayan, tanganing mag-implementar kan Search Warrant kontra sa mga suspechado na imbuelto sa pagbariwas nin ilegal na droga.

Antes pang gibohon an poonan an pag rekisa kan pig eestaran na residencia kan mga suspechado, si alyas “Saudi” enot na tulos na pinaputokan an mga awtoridad.

Huli kan siring na pangyayari, nagbalos an composite team kan pulis kaya tinamaan nin bala si alyas “Saudi.”

Binawian siya nin buhay sa lugar na pinangyarihan kan incidente.

Mientrastanto, an mga miembros kan SOCO nagconducir na kan saindang pagsiyasat sa nangyari.

Idinagdag sa report na ini na sinda Marichu Ismael asin Ely Repol, anas nagsuko sa mga awtoridad.

Nakua kan mga imbestigador sa laog kan bulsa ni alyas “Saudi” an sarong calibre .45 na Norinco Pistol na may karga nin magazine asin may anom na bala; sarong capsula nin badil na pinaputok na; tulong baseyong capsula; glass tooter; 1 sadit na heat-sealed transparent plastic sachet na may laog na pigtutubudan na shabu; asin iba pang mga gamit sa pag-usar nin droga.

Nakakua pa an mga awtoridad nin sarong unit nin calibre .45, 1 magazine para sa cal .45, asin 7ng mga bala para sa cal .45 na badil.

An mga nacompiscar na mga gamit pig-imbentaryo kan mga awtoridad sa atubangan kan mga testigo.

Pighahanda na ngonian kan pulis an isasangat na caso contra sa mga suspechado sa pagbalga kan R.A. 9165, mapadapit sa illegal drugs asin R.A. 10591, para sa illegal possession of firearms and ammunition.

Start typing and press Enter to search