Tuesday, August 9, 2016

Supplier nin shabu sa Calauag, Quezon, dakop sa Naga City

NAGA CITY August 9, 2016 (Bicol Standard) -- Pinili kuta ni Razel Erepol y Bandagoza an oras na alas-4 nin mag-umagahon para maghatod nin binultong shabu sa Naga City, alagad, dae na siya nakasalvar sa mga nagbabantay na awtoridad.


Segun sa report, si Erepol, may darang dakulang bulto nin droga na carculadong may valor na P80,000, para itinda digdi.

An suspechado taga Brgy. Sabang 2, sa Calauag, Quezon.

Huli ta bistado na siya na paradara nin darakulang bulto nin shabu, pigplanohan na kan mga awtoridad na dakopon siya sa paagui nin entrapment operation.

Kasubagong aga, nagtapos na an saiyang negosyo, kan mapabakalan niya nin droga an sarong pulis na nagsaguin-saguin na parabakal.

Si PO1 Rowel Pornelosa, an nagpamalo na poseur buyer nagduhol nin saro man na bultong cuarta, na suboot an kantidad P80,000 sa suspechado.

Pero, an suboot cuarta na hale sa pulis mga tinabas na dyaryo, na sa ibabaw, may nakabugtak na kantidad P1,000 na totoong cuarta.

Marikas si naguing transaksyon ni Erepol asin kan pulis.

Kan makapotan na kan suspechado an suboot cuarta na kabaklan kan droga, saka na siya tinakma kan mga kaibang police kan nagsaguinsaguin na parabakal.

Afuera kan shabu, may iba pang nakua na gamit hale sa suspechado, arog kan cellphone.

Hastang ngonian na sinusurat an baretang ini, si Erepol pig-iimbestigaran pa kan mga awtoridad sa hepatura kan PNP.

Sasangatan siya nin caso sa pagbalga kan Republic Act 9165 na mas bantog sa apod na Dangerous Drugs Act of 2002.
Share:

SPECIAL OFFER

SPECIAL OFFER

Featured Post

Chief Supt. Gardiola assumes as Bicol top cop

LEGAZPI CITY 7/10/17 (Bicol Standard)--Police Chief Supt. Antonio N. Gardiola has been installed as the Acting Regional Director of...