Wednesday, August 24, 2016

Paratinda nin shabu sa laguerta kan Naga Cathedral, natuklo na

NAGA CITY August 24, 2016 (Bicol Standard) –Sa laog mismo kan laguerta kan Naga Metopolitan Cathedral nangyari an buy-bust operation na ikinasa kan mga pulis, para dakopon sinda Julius Delovieres y Marcelo alyas “Tagalog” asin Edmundo Albuero y Pimentel na parehong nasa halabang 
listahan kan mga imbuelto sa pagtinda nin shabu digdi.

Naga Metropolitan Cathedral
Bicol Standard file photo
Sabi kan imbestigador, alas 11:45 nin odto kan Lunes (Agosto 22), sarong babaeng pulis an nagbakal nin shabu ki Julius Delovieres, sa kantidad na P500.

An sarong sachet nin shabu iginagwaw ni Edmundo Alberto sa nag-saguin-saguin na parabakal.

Alagad, madaling nakamalesya sinda Delovieres asin Alberto na an saindang napabakalan mga awtoridad, kaya marikas sinda nagkutipas pasiring sa direksyon kan Santonja St., dangan nagsiko pawala sa Penafrancia Ave.

Sa tungod kan likod na gate kan Universidad de Sta Isabel sinda natringkahan kan mga nagbukod na mga awtoridad.

Nakua sa poder asin control ni Delovieres an sarong pidasong P500 na may serial number na AN75887 na ginamit bilang buy-bust money.

Presente durante kan operasyon na ini iyo sinda Tex Agor, an representante kan media, Domingo M. Villareal, hale sa DOJ, asin si Brgy. Kagaward Winefreda Villacruz, oficial kan barangay.

Si Delovieres taga Zone 2, San Rafael, Cararayan mantang si Edmundo Alberto y Pimentel, taga P. Santos St., Zone 3, Brgy Bagumbayan Sur, digdi.

Maatubang sindang caso sa pagbalga kan Art II, Section 5 kan R.A. 9165, an ley na nagkakastigo sa mga tawong imbuelto sa droga.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...