OOPS! Drug pusher sa Isla Sison, nadakop na naman

NAGA CITY Agosto 8, 2018 (Bicol Standard) – Nahulog sa bungog na talinga ni Randy Alegre y Quirante, 39, taga Isla Sison (Sitio Sagrada Familia) si pakiolay ni Mayor John Bongat na mag-ontok siya sa pag bariwas kan pigbabawal na droga digdi.

Shabu file photo
CIDG Bicol
Poco mas o menos alas 9:45 kasubagong aga, harane sa compound kan mga Alegre sa Isla Sison, natuklo guiraray si Alegre kan mga awtoridad, na may darang pulbos na nakalaag sa plastic sachet, na pigtutubodan na shabu.

An suspechado, sabi kan pulis dati nang nagsumpa ki Mayor Bongat sa City Hall na isisikwal na niya an maraot na gibo, sa pagtinda nin droga.

Alagad, pirang semana sana an naka-agi, an suspechado, nataraka kan mga awtoridad, na nagpasiring sa Isla Sison tanganing ipadagos an pagtoktok sa mga harong na may nag-eestar na tawo na naggagamit o nagtitinda pa kan bawal na bulong.

Si Alegre, idinagdag pa kan pulis, enot nang kinasohan sa pagbalga kan ley dapit sa ilegal na droga, pero nadismiss si kaso na isinangat kontra saiya.

Sa operasyon kan pulis kasubago, may kaiba sindang mga oficial kan barangay, mga miembros kan media, asin representante kan DOJ.

An sabi sa report kan pulis, narisa ninda na si Randy Alegre enterong nagkikibigkibig an saiyang mga kamot kan makasabatan an mga awtoridad, harane sa Alegre compound.

Kan hinapot an suspechado kun tano ta naglulungsi siya asin tinatakigan, napiritan ining bukasan an saiyang palad na may kinumo-kumo na plastic sachet, na pig tutubodan na shabu.

Yaon na ngonian sa hepatura kan pulis an suspechadong drug pusher para imbistigaran asin plantearan nin kaso sa pagbalga kan Dangerous Drugs Act of 2002. Nalalangob pa siya ngonian sa detention cell kan Naga City Police.

Start typing and press Enter to search