Monday, August 15, 2016

Iwal nin magtugang: Tinaga sa liog an saiyang hermano, gadan

TINAMBAC, Camarines Sur August 15, 2016 (Bicol Standard) –Hinahanap pa hasta ngonian kan mga awtoridad si Gerome Marcial y Guisic, an suspechado sa pag gadan sa saiyang tugang na si Alan Marcial y Guisic, na pareyong taga Sitio Libtong, Brgy Lupi sa banwaan na ini.


Nangyari an krimen kan fecha 13 kan presenteng bulan, poco mas o menos alas 12:20 nin aga, sa sinambit na barangay.

Sabi sa resulta kan pagsiyasat, an victima asin an suspechado nagkaigwa nin diriskusyonan sa sarong inoman, durante kan reunion kan mga miembros kan saindang familia.

Huli kan binino kan arak, naging mainit si riribayan nin mga malanit na mga tataramon na iyong guinikanan tanganing an suspechado magkua nin armas, para tagaon an saiyang tugang.

Gamit an matarom na sundang, dinagoso ni Gerome Marcial an saiyang tugang na si Alan, tulos-tulos tinapas an liog kan victima.

An pirang pulgada na rarom nin lugad sa liog kan victima na iyong naging rason para matitian siya nin dugo asin magadan.

Pakatapos kan incidente, an suspechado marikas na nagdulag pasiring sa dae maaraman na direksyon.
Nangapodan an mga mientros kan familia Marcial sa suspechado na magsurrender na siya tulos sa mga awtoridad, asin atubangon an saiyang kasalan.

Sagkod sa oras na sinusurat an baretang ini, mayo pang informasyon dapit sa kinakamugtakan kan suspechado.
Share:

SPECIAL OFFER

SPECIAL OFFER

Featured Post

Mayor Gaite to file MR

BAAO, Camarines Sur –“ I will not resist if the order of the Ombudsman is served upon me by the Department of Interior and Local Gove...