Wednesday, August 24, 2016

Victima nin holdup sa Naga City, binawian na nin buhay

NAGA CITY August 24, 2016 (Bicol Standard) –Binawian man guiraray nin buhay si Rodrigo Caguimbal na taga Saint Claire Subdivision, Concepcion Pequena, na binadil kan mga suspechado na nagsalakat sa tindahan kan victima, kan Lunes.



Base sa declarasyon ni Mary Jane Oliver-Caguimbal, agom kan victima, an saiyang agom nakatindog sa saiyang kataid, mantang sinasaradohan an saindang mini-grocery store, na namumugtak sa enot nang nasambit na lugar.

Bigla na sanang nagdulok sainda an duwang dae bistong mga lalaki, an saro nakasulot nin jacket na may suklob sa payo, na tulos nagtutok saiya kan saiyang armas na badil.

Dangan, nagdeklarar nin holdup.

Fuerzahan na inagaw ki Mary Jane Oliver-Caguimbal si dara niyang sling bag, asin nag-ansyas nang magdulag.

An bag may laog nin ATM sa Landbank, CARD Bank ID; Voter’s ID, cash na kantidad P6,000, asin cellphone na dae maaraman an valor.

Mientrastanto, nagbirik pabalik sa saiyang agom an saro sa mga suspechado, asin binadil an saiyang esposong si Rodrigo, saka naglakaw sanang luhay-luhay, parayo sa lugar kan krimen.

Mantang parayo na an duwa pasiring sa Magtoto compound, nagpaputok pa nin sarong bala, asin dereho nang nahale padulag.

An victima tulos dinara sa hospital para ipabulong.

Sabi sa follow-up investigation, kasubago binawian na nin buhay an victima huli sa taka nin bala hale sa calibre .45ng pistola.


Nakua hale sa pinangyarihan kan krimen an 2ng capsula kan pinaputok nang bala hale sa calibre .45, na dinara sa Crime Laboratory Office kan pulis, para examinon asin gamiton na evidencia sa caso.
Share:

Featured Post

Tinambac aide runs away with Php3.4M bonus budget

TINAMBAC, Camarines Sur 11/15/17 (Bicol Standard) – At least 115 regular employees and 11 elected municipal officials of this town will be ...