Sunday, August 7, 2016

Citizen’s Arrest, pinaasir sa pagdakop kan parahabas sa Daraga

LEGAZPI CITY, August 6, 2016 (Bicol Standard) — Bakong sa paagui nin Mandamiento de Arresto na hale sa jusgado, kundi an inaapod na Citizen’s Arrest an ginamit na paagui ni Inocencio Niego y Ormilla sa pagdakop ki Lara Jean Esparrago y Griego, na sinasahotan na naghabas nin mga alajas asin cuartang cash sa M. Lhullier branch sa ciudad na ini.


Si Niego iyo an Branch Manager kan sanga kan M. Lhuillier sa Bitano digdi.

An inarestar na si Esparrago iyo an Asst. Branch Manager kan M. Lhuillier sa Daraga, Albay.

Segun sa report kan pulis, poco mas o menos alas 4:15 nin hapon dinakop si Esparrago.

Inarestar siya ni Niego kan maseguro na kaini na Esparrago iyo man sana an naghabas kan mga alajas asin cuartang cash sa saindang oficina.

An casong isasangat contra sa suspechado iyo an Qualified Theft, na may mas magabat na padusa, kun i-comparar sa silot sa ordinaryong paghabas.

An sabi, naki-estoryahan ngona si Niego ki Esparrago sagkod na ma-cierto niya na si mga nawawarang alahas sa M. Lhullier branch, yaon talaga sa poder kan suspechado, patin si nawawarang cuartang kantidad P25,000.00.

Sabi sa report, kan na secure na ni Niego na si mga nawawara sa saindang inventoryo kan Agosto 1, 2016, iyo talaga an kapot kan suspechado, dae na siya nag duwa-duwa na pugolan dangan arestaron si Esparrago.

An suspechado temporaryong nag-eestar sa Brgy. Binitayan, Daraga, Albay.

Nakua pa saiya an minasunod: sarong pidasong transparent sachet na may laog na bulawan na kwentas na may tampok asin may logo pa kan M. Lhullier; sarong padis na bulawan na hikaw na 18K; sarong pidasong bulawan na singsing na 22K; sarong pidasong bulawan na kulentas na may tampok asin saro pang pidasong bulawan na tampok.

Dinara tulos sa hapetura kan pulis sa ciudad na ini an suspechado tanganing ipadagos an imbestigasyon, para sa pagsangat nin magkakanigong kaso.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...