2 gadan sa aksidente kan Silver Star Bus sa Sorsogon

SORSOGON CITY August 19, 2016 (Bicol Standard) – Duwang personas an binawian nin buhay sa nangyaring makangirhat na aksidente sa vehiculo na byaheng Ormoc City – Cubao, Quezon City.



Sabi report an nadisgrasyang bus iyo an Silver Star, na may body number 209 asin may plakang WOG 722.

Nabisto an pangaran kan driver na iyo si Angel Factor.

Sinabi sa interview ngonian na aga ki Police Provincial Dir. SrSupt Rolando Cabral kan Sorsogon na talagang delinkwente an lugar na pinangyarihan kan aksidente.

An matulin na dalagan kan bus mantang nasa may curbadang parte kan tinampo an sinasabing mayor na rason kun nata ta nangyari an aksidente.

Nagluluwas pa sa pagsiyasat na an kadaklan kan mga naaksidente sa lugar na ini iyo an mga driver na dae kabisado an tinampo sa sinambit na lugar.

Segun sa driver nawaran siya nin control kan manibela mantang nagdadalagan an bus sa lugar.

An ibang mga pasahero na irido sa aksidente an dinara man tulos sa sarong ospital sa Irosin, Sorsogon.

An mga binawian nin buhay iyo sinda Diosdada Petines y Java, 57, taga Ormoc City asin Leonora Kent, na taga Calbayog City.

Start typing and press Enter to search