Sunday, July 17, 2016

Suspect na naghabas nin P3.4M sa Rapu-Rapu, nadakop

RAPU-RAPU, Albay, July 16, 2016 (Bicol Standard) – Sa binino kan mandamiento de aresto na pinaluwas kan jusgado, dinakop kan mga awtoridad si Henry Bibat, 44 anyos, residente kan Brgy. Carcaran digdi.


Si Bibat iyo an saro sa mga suspechado na sinasahotan na naghabas kan kantidad P3.4 milyones na para kuta sa mga beneficiaryo kan Conditional Cash Transfer (CCT) sa banwaan na ini.

Tinakma asin pinusasan an suspechado sa laog mismo kan saindang residencia kasoodma, Viernes, poco mas o menos ala 1:30 nin hapon.

Pigcoconsiderar si Bibat na ika duwa sa listahan kan mga “most wanted” na tawo sa banwaan na ini, huli kan inaatubang na asuntong pagsalakat na naka sangat ngonian sa Branch 4 kan Regional Trial Court (RTC.)

Sa record kan jusgado, si Henry Bibat asin an saiyang ama-on na si Eddie Bibat iyo an ipigtutukdo kan mga testigo na nag-lalay kan dakulang fundo para sa mga benefeciaryo kan CCT program kan Department of Social Welfare and Development (DSWD).

Nawara an cuarta kan Enero ngonian na taon.

Mientrastanto, hasta sa panahon sinusurat an baretang ini dae pa nadadakop si Eddie.

Sa enot na imbestigasyon kan pulis, duwang lalaki na nakasulot nin maskara asin may darang armas na kutsilyo an fuersahan na naglaog sa pigpapaarkilahan na harong ni Bibat sa Barangay Villahermosa, sa Isla kan Batan.

Sa paarkilahan na harong na ini nag eestar an duwang mga empleado kan Saint Anthony Development Cooperative (SADC) na iyo an may pugol kan cuarta, antes sindang salakaton.

An sabi, bigla sanang linaog kan mga parasalakat si harong na kinakamugtakan kan cuarta asin binitbit an fundo na para kuta sa 1,350 na mga beneficiaryo kan programa sa CCT.

An mga empleado kan Saint Anthony Development Cooperative ginarapos ngona antes na kinua an cuarta.

Nagtutubod an mga imbestigador na “inside job” an nangyaring pag salakat.

Si Eddie Bibat elihidong consejal kan barangay na ini asin iyong kagsadire kan paarkilahan na harong na sinalakat. (BICOLSTANDARD.COM)
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...