Mag-ina dinakop mantang nagpapabakal droga

NAGA CITY Julio 2, 2016 (Bicol Standard) – Pagkatapos nin halawig nang pagmasid kan saiyang mga gibo asin gawi-gawi, nadakop man guiraray si Joy Garcia kan mga awtoridad sa ginibong entrapment operation kan sarong aldaw.

Si Garcia, 40, iyo an sinasabing ika-10 sa drug watchlist sa Camarines Sur.

Nadakop an suspechado kaiba an saiyang 16 anyos na aki, na sabi sa imbestigasyon iyong ginagamit na parahatod kan droga na ipinapabakal kan saiyang inang si Joy.

Nagluluwas pa sa pagsisayat na an agom ni Garcia, dati man na imbuelto sa pagpabakal nin droga.

Kan 2011 an saiyang agom rinamalan kan mga pulis sa Lupi, Camarines Sur huli ta suspechado sa pagbariwas kan ipinapangalad na bulong.

Mientrastanto, sabi sa report kan Sipocot PNP, may nakuang sarong plastic sachet sa poder kan aki kan suspechado na nagkakantidad P3,000 sa barakalan sa tinampo.

An mga awtoridad na nagdakop ki Garcia nakipagcoordinar na sa oficina kan Department of Social Welfare and Development (DSWD) para sa magkakaningong disposisyon kan menor de edad na aki ni Garcia.

An suspechado kakasohan nin pagbalga sa RA 9165 o mas bisto sa apod na Comprehensive Dangerous Drugs Act of 2002. (BICOLSTANDARD.COM)

Start typing and press Enter to search