Driver/conductor kan Elavil Bus, dinakop sa buy bust operation

MAGALLANES, Sorsogon (July 27, 2016) Dinakop kan mga awtoridad si Rodolfo Cornelio Jr y Salon, an pig coconsiderar na No. 1 na drug personality sa banwaan na ini, sa sarong buy bust operation na ginibo kasubagong ala 1:20 nin hapon.



An pinag sararong operasyon kan mga awtoridad ginibo sa laog kan Elavil Bus Terminal, digdi.

Si Cornelio Jr.,nag tatrabaho bilang driver/conductor kan sinambit na companiya nin bus, haloy nang pig mamasidan an hiro-hiro kan mga awtoridad, antes na mangyari an sinambit na buy bust operation.

An suspechado taga Brgy. Matacon, Polangui, Albay.

Mientrastanto, sabi kan mga imbestigador, si Cornelio nagpabakal nin sarong heat sealed transparent sachet na may laog nin pig tutubodan na methamphetamine hydrochloride na mas bisto sa apod na shabu, sa sarong asset kan police.

An valor kan shabu na ipinabakal kan suspechado sa asset kan police kantidad P500.000, na kun saen an ibinayad saiya “marked money”.

Segun sa imbestigasyon, pakatapos sanang igawgaw sa parabakal kan droga an shabu asin recibehon man niya si bayad na cuarta, saka pa sana nag arabotan si mga police na iyong nag arestar saiya.

Si Cornelio yaon ngonian sa poder kan police mantang pig hahanda an magkakanigong asunto kriminal na isasangat kontra sa saiya.

Kakasohan an suspechado nin pagbalga  kan ley dapit sa pagpabakal nin ipinagbabawal na bulong. (BICOLSTANDARD.COM)

Start typing and press Enter to search