Saturday, July 30, 2016

Brgy. Kapitan sa Minalabac, dakop sa droga

Minalabac, Camarines Sur, July 30, 2016 (Bicol Standard) –Saro kan 4 na Punong Barangays sa banwaan na ini na enot nang nagsuko sa pulis asin nagpromisang makikipagtabangan sa kampanya kontra sa illegal na droga an dinakop kan mga awtoridad, poco mas o menos ala 1:00 nin mag-umagahon ngonian na aldaw, sa laog kan saindang residencia.

File photo: Oplan Droga
Susog sa blotter kan pulis, an dinakop iyo si Kapitan Domingo “Sandy” Banaga kan Taric.

Sabi sa informasyon, haloy na nindang pigmamanmanan an mga aktibidad kan sinambit na persona na saro sa pinagkukuanan kan illegal na droga na pigsusupply sa mga barangay digdi.

An pinagsararong team kan mga pulis na pinamayohan ni PSupt. Arnulfo Silencio asin PCI Edgar F. Valencia, hefe kan PNP Minalabac an nanginotan sa pag-enforsar kan Search Warrant na firmado ni RTC Judge Timoteo Panga Jr., na ipinaluwas kan fecha 27 ngonian na bulan.

Sa atubangan kan mga testigo nakua sa laog kan residencia ni Banaga an mga evidenciang shabu, alluminum foil na ginagamit sa pagshabu, sarong cal. 38ng revolver na may kargang mga bala, asin lighter.

An Search Warrant may No. 2016-107.

Sasangatan si Banaga nin kasong pagbalga kan RA 9165 na mas bisto sa apod na Dangerous Drugs Act 0f 2002.

Maroromdoman na dae pa lang nahahaloy nagluwas sa record kan Provincial Headquarters kan PNP sa Camarines Sur na apat (4) na Punong Barangay kan Minalabac an voluntad na nagsurrender sa hepatura kan police sa banwaan, asin nagpromisang makikipag tabangan sa kampanya kan Duterte administration contra sa illegal na druga.

Afuera kan Punong Barangay kan Tariric nasambit pa sa pareyong report na nagsuko man iyo an Punong Barangay kan Salingogon, Manapao asin Antipolo.

Nagpapadagos pa an pagproceso kan caso na isasangat contra ki Kapitan Banaga ngonian na aga sa Minalabac Municipal Police Station. (BICOLSTANDARD.COM)
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...