Thursday, June 2, 2016

Paratindang droga sa Tinambac, dakop sa buy-bust

TINAMBAC, CSur—Pagbalga sa Republic Act 9165 o an illegal na pagpabakal nin droga an isasangat na caso contra ki Rodel Daliva y Revilla, 27 anyos, may-agom, taga Zone 6, Brgy. Salvacion sa banwaan na ini na nadakop sa buy bust operasyon kan pulis kasoodma, Junio 1.

Inarestar si Daliva kan siya magpabakal nin pigtutubodan na shabu sa sarong miembro kan pulis na nagsagin-sagin na parabakal kan ipigbabawal na droga.

Durante kan operasyon kan mga awtoridad nakua sa suspechado an 1ng medium transparent plastic sachet na may laog nin droga na saiyang ipinapabakal sa kantidad na P500.00.

Mientrastanto, kan si Daliva arestaron, nakakua pa an mga pulis nin 1ng dakulang transparent plastic sachet, na may laog man guiraray nin shabu asin 5ng pidasong saradit na transparent sachet na may laog na maputing pulbos, na pigtutubodan kan mga awtoridad na shabu pa guiraray.

Sarong pidasong papel na cuarta na P500.00 an yaon sa laog kan media pantalon kan suspechado.

Sabi sa report kan mga imbestigador haloy nang pigplano an buy-bust operation contra ki Daliva huli ta yaon an saiyang pangaran sa mga parapabakal nin shabu sa lugar na nasambit.

Kaiba an representante kan DOJ, media asin oficial kan barangay, dinara an suspechado sa hepatura kan pulis digdi para sangatan nin kaso sa pagbalga kan nasambit na ley. (BICOLSTANDARD.COM)
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...