Wednesday, June 22, 2016

No. 1 drug personality sa San Jose, Cam Sur, nabadil kan pulis

SAN JOSE, Camarines Sur, Junio 22 (Bicol Standard) –Inako ni PO1 Rustom Dellova na binadil niya asin nagadan si Roy Abragan y Sarcilla, an sinasabing No. 1 na drug personality sa banwaan na ini, kan sarong aldaw (Junio 20), poco mas o menos alas 4:00 nin hapon.

Base sa record, si Police Senior Inspector Bernardo Salar Penero, an acting na hefe pulis digdi, asin si Police Inspector Andrew Jacob Alcomendas, hefe kan Lagonoy MPS tarabang sa pagserve kan search warrant contra ki Jaymark Hara y Bares, 20 anyos, soltero, na nag-eerok sa Gawad Kalinga Site, Brgy. Telegrapho, asin ki Roy Abreagan y Sarcilla, 38 anyos, soltero, taga Zone 7 kan kaparehong barangay.

Enot na nadakop si Jaymark Hara y Bares, sa saiyang residencia.

Alagad, mantang nagpapadagos an implementasyon kan search warrant, biglang nagbutwa si Roy Abragan na may dara nin badil asin duwang beses na kiniblit an gatilyo.

Maswerte na nadae nagputok an badil.

Huli kan siring na pangyayari nagpulos-pugos padulag si Abragan.

Nagkaigwa nin ralamagan, na kun saen nagibo pa ni Abragan himuntahon asin putokan kan saiyang armas an pulis, alagad, maswerteng dae tinamaan.

Sa puntong ini binadil na ni PO1 Dellova an suspechado na tinamaan nin bala sa saiyang lawas.

Maski may tama na nin bala, nagibo pa ni Abragan na mag-abante nin nagkapirang metros pa, antes siyang magsungkab asin natumba.

Tinabangan kan mga awtoridad na darahon sa Partido District Hospital an suspechado.

Pero, kan darahon sa hospital, ipigdeclarar siyang mayo nang buhay.

An mga imbestigador may nakuang sarong calibre .22 na revolver na may bala sa pinangyarihan kan krimen.

Afuera kaini, dakul pang mga drug paraphernalia asin pigtutubodan na pulbos nin shabu an nakua sa poder kan suspechado.

An search warrant contra sa mga suspechado firmado ni Judge Ma. Angela Acompanado-Arroyo, Executive Judge, Branch 58, RTC San Jose, Camarines Sur.(BICOLSTANDARD.COM)
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...