Monday, June 13, 2016

No.1 na Most Wanted sa Guinobatan, nadakop na

GUINOBATAN, Albay –Nadakop man guiraray kan mga awtoridad an pigkokonsiderar na No 1 na Most Wanted sa watchlist kan mga pulis digdi, na pinangaranan na si John Joseph "Juancho" Olayres y Prudente.

Si Olayres haloy nang pighahanap huli sa saiyang inaatubang na caso na may relasyon sa ipigbabawal na droga.

Segun sa report, pinosasan kan mga pulis si Olayres kan siya servehan kan Warrant of Arrest na firmado ni Judge Frank E. Lobrigo kan Branch 3 kan Regional Trial Court sa Legazpi City.

An caso kan suspechado iyo an pagbalga kan Section 5, Article II kan RA 9165 na mas bisto sa pangaran na Comprehensive Dangerous Drugs Act of 2002.

Dinakop siya alas 6:40 nin bangui kan Junio 10, sa Sitio Basud, Brgy. San Rafael, sa banwaan na ini.

Si SPO3 Ruperto E. Solana iyo an nanginotan sa pag-aprehender sa saiya por medio kan pagserve kan mandamiento de arresto.

Mientrastanto, pagkatapos na iserve sa suspechado an Arrest Warrant, nakuanan pa guiraray siya nin ipinagpapangalad na droga asin iba pang mga paraphernalia.

Sarong medium size na plastic sachet na may laog nin maputing pulbos na pigtutubodan na shabu an narecover sa saiyang poder kan siya dakopon. Kaibahan kan plastic sachet iyo an 6 na silag na plastic sachet, anom (6) na aluminum foil strip, na may latak pa nin maputi na pulbos na pwedeng shabu; sarong itom an color na Lenovo cellular phone asin duwang (2) mga plastic na tooters.

Pagkatapos kan pag-imbentaryo kan mga gamit na nakua sa saiyang poder, dinara an suspechadong si Olaytes sa hepatura kan pulis para sa pagsangat nin magkakanigong caso. (BICOLSTANDARD.COM)
Share:

SPECIAL OFFER

SPECIAL OFFER

Featured Post

Daet P20M garbage project quizzed

Former Mayor Tito Sarion DAET, Camarines Norte — The pile-up of uncollected garbage in this town has urged residents to revive the inqu...