Election sa barangay dagos sa Octubre sabi ni Duterte



DAVAO CITY – Habo an elihidong presidente na si Rodrigo Duterte na i-oktaba an election sa barangay asin sa Sangguniang Kabataan na naka schedule sa Octubre ngonian na taon.

Sabi ni Duterte kun i-ooktaba an election, an mga nakatukaw na oficiales kan barangay ma-serve sa inaapod na holdover capacity, o garong tumatao sana.

“Dae ako pabor. Mismong an ley an nagsasabi kun abot sana saen an pagserve kan mga elihidong official kan barangay,” dagdag pa niyang pahayag.

An pag-oktaba kan election sa barangay asin sa SK nagkakaipo nin bagong lehislasyon kan congress.

Mientrastanto, nagkapirang mga bagong elihidong congressista an enot nang nagpahayag na masunad tulos sinda nin ley sa camara baha, para horoton an pag-oktaba kan pirilian sa barangay.

Enot na nagpahayag kan siring na kaisipan iyo si Joey Salceda, na iyo nang elihidong deputado sa ika duwang distrito kan Albay.

Segun ki Salceda pagbukas sana kan 17th Congress ma-file tulos siya nin bill na ma-oktaba kan nasambit na election.

Sa ibong na lado sinabi man ni Comelec Chairman Andres Bautista na pabor siya sa pag oktaba kan election sa barangay.

Apisar suboot na magastos na maray ini, mapagal pang maray huli ta manual an paagi sa pagpili kan mga official kan barangay asin Sangguniang Kabataan (SK).

Afuera kan enot na rason, kaipohan pang magtalaan ngona nin bagong rehistrasyon sa mga botante, bako sanang para sa mga oficial kan barangay, alagad orog na sa mga miembros kan SK.

Sa lindong kan bagong ley na nagsasakop kan SK, an mga kalifidadong magbale sa SK poon sa edad na 18 hasta 23 anyos na. (BICOLSTANDARD.COM)

Start typing and press Enter to search