Bicol newspaper | Bicol Standard | Get Bicol news about the Bicol region: Naga City, Camarines Sur, Albay, Legazpi City, Masbate, Sorsogon, Camarines Norte and Catanduanes.

Wednesday, June 15, 2016

Budol-budol, nakabiktima na naman sa Daet

DAET, Camarines Norte -- Duwang tao, sarong lalaki kaiba an sarong babae. Nagpapatabang na makahanap nin pwedeng ma-arkilang truck.

Ini an luma nang maray na modus operandi nin mga tawo na imbuelto sa inaapod na “budol-budol”, na sarong forma nin panloloko.

Alagad, apisar na gasgas na an siring na drama na gamit sa kalokohan, pirme pa guiraray nakakabiktima nin mga madaling patubodon na mga tao.

Kan sarong aldaw, si Marinel Alcantara y Jumarang, 23 anyos, taga Purok 1, Brgy Mambalite, sa banwaan na ini nakadagdag na naman sa halabaon nang listahan kan mga victima kan sindikato.

An incidente nangyari sa atubangan kan Daet Elementary School, sa Gov. Panotes Ave., Brgy. VII, digdi.

Dae bisto kan vitima an mga suspechado.

Ini an mga nangyari:

Mantang an victima naglalakaw, sarong dae niya bistong babae an nagrani asin naghapot kun igwa siyang kabistong may rent-a-truck na negosyo. Kan nag-oolay sinda, may lalaking nagdulok asin nagsabi na igwa siya nin amigo na may nasambit na negosyo.

Nagsabi an victima na inagda siya asin an saiyang kaolay na babae na magpasiring ngona sa Daet Elementary School, mantang si lalaki na nagrani sainda nagpaaram na maduman sa may sadire kan rent-a-truck na negosyo para kaolayon.

Pirang minutos sana, nagbalik na si lalaki.

Sinabihan si babae na suspect sa casong ini na nakaolay na niya si kagsadire kan truck.

Alagad, kaipohan na magfirma siya nin sarong kasuratan sa paggamit kan truck.

Saro pa sa mga condisyon na sinabi iyo na dapat ibugtak ninda an saindang cuarta sa bag asin an ibang mga gamit para pagpaheling an saindang tiwala sa kaolay ninda.

Ginibo ini kan victima.

Ilinaog niya an kantidad P10,000 na cash sa bag asin an ATM card.

Si kaolay niya na mga suspechado sa casong ini, itinao man sa victima an suboot bulto nin cuartang napapatos sa papel asin passbook na dae aram kun gurano an laog na kantidad.

Nag-ibahan si suspechadong babae asin lalaki pasiring sa kaolay na maysadire kan truck.

Nagkasundo sindang marharalatan na sana sa laog kan Jolibee, pakatapos kan saindang transaksyon.

Nagparahalat an victima.

Dae na nagbalik si lalaki asin babae na kaolay niya.

Kan mayo nang tinagalan sa pagparahalat, binukasan kan victima si iwinalat saiyang suboot napapatos na cuarta kaibahan an passbook kan lalaki.

Nagbururikat an saiyang mga mata kan maheling na an sinasabing cuarta mga tinabas na papel man sana.

Inako kan victima na dae niya pighuhuna na an saiyang mga kaolay mga tao na imbuelto sa “budol-budol.” (BICOLSTANDARD.COM)
Share:

Featured Post

Advantages and disadvantages of mother tongue-based education

Photo: Naga Smiles to the World by Shiela S. Ronquillo Del Gallego Central, Del Gallego District Since School Year (SY) 2012-2013,...