Wednesday, June 1, 2016

3 irido sa pambabadil sa laog nin bar sa Naga City

NAGA CITY–Nagpapadagos an imbestigasyon kan puli sa nangyaring pambabadil kan dae bistong lalaki sa laog kan Backdraft Bar, sa Mayon Ave, Brgy Triangulo digdi kan sarong aldaw.

An mga imbestigador nakikipagcoordinar sa mga tawong pwedeng makataong giya sa mga awtoridad kun sisay si lalaking bigla na sanang nagpa putok kan saiyang darang badil, poco mas o menos alas 7:30 nin banggui kan Domingo (Mayo 27) sa laog kan bar.

An mga victima na nabistong sinda Guilermo Abrenica y Rasonable, 40 anyos, taga Camaligan; Christopher Hermiso y So, 32 anyos, taga Concepcion Pequena; asin Ben Francis Nasayao y Moral, 25 anyos, taga Upper Gapo, Camalig, Albay.

Base sa informasyon na naguno kan mga awtoridad, an mga victima kaibahan an nagkapira pang mga pag-iriba nagkakakan asin nag-iinom sa laog kan nasambit na establisimiento commercial kan bigla na sanang maglaog an sarong lalaki.

Mayong malinaw na declarasyon kun ano an problema ta mayo man nin pigtutubodan na kaiwal kan bigla na sana ining magbunot kan saiyang darang badil an lalaki.

Dae aram kan mga awtoridad kun anong calibre an ginamit kan dae nabistong suspechado.

Idinagdag sa report na biglang nagsiriblagan si mga tawo na nasa laog kan bar kan magpoon an pagpaputok kan badil.

Tulong beses na pinaputok an armas na nagresulta sa pagkakalugad kan mga nasambit na victima.

Dinara tulos an mga nalugadan sa Bicol Medical Center tanganing ipabulong.

Hasta sa oras na sinusurat an baretang ini mayo pa nin malinaw na bareta sa nangyari.

Saro sa mga anggulong pig-aadalan kan mga pulis iyo an posibleng pag selos kan suspechado sa sarong customer kan bar.

Alagad, mayo nin pusog na evidencia dapit digdi.

Huli sa sinambit na pangyayari, dae pa nagpopondo an mga awtoridad sa pagsusug kan causa kan nasambit na incindente nin pambabadil hasta ngonian. (BICOLSTANDARD.COM).
Share:

Featured Post

Drug lab query continues

Committee on Dangerous Drugs points to more inconsistencies VIRAC, Catanduanes 2/27/17 (Bicol Standard)—The House Committee on Dange...