Wednesday, June 22, 2016

Sugalan sa Daraga dakop; 2ng Punong barangay, 6 pa, arestado

DARAGA, Albay, Junio 22, 2016 (Bicol Standard)—Nag-aabot sa total na kantidad na P271,942.75 an naponpon kan mga awtoridad sa ginibong anti-illegal gambling operation kasubanggui, poco mas o menos alas 10:45, sa P-3, Brgy. Sipi, sa banwaan na ini.

Sinakyada kan mga pulis an piggigibohan kan ilegal na aktibidad sa Maranaw Restobar/Josephine ihaw-ihaw and Food Service na haloy nang pig titiriponan kan mga agit-agitan na para kawat nin baraha na inaapod na poker.

Kabale sa mga nataraka sa sugalan iyo an duwang Punong Barangay, na pigmidbid na iyo sinda Wilfredo Nayve y Nacion, 47 anyos, kan Brgy. Market Site sa banwaan na ini; asin Nap Cardel y Abion, 53 anyos, kan Binanuahan, Legazapi City.

Sasangatan sinda nin kaso huli sa pagbalga sa Presidential Decree No. 1602, o an ley dapit sa illegal gambling.

Mientrastanto, kabale pa sa mga dinarakop sa sugalan iyo an minasunod: Margie Barcelon y Guades, 51 anyos, may agom, taga Brgy. Sagpon; Elvie Mapagdalita y Manzano, 44 anyos kan Brgy. Bagumbayan; Michael Millena y Aguilar, 39, may agom, kan Brgy. Tagas, gabos sa banwaan na ini; si Edgar Manzano, 18 anyos, soltero, taga Brgy. 16, kan Legazpi City; Vicky Galicia y Alejandro, 50 anyos, may agom, taga Brgy. 4, Sagpon, Legazpi City; asin si Noel Repolles y Soria, 39 anyos, may agom, taga Brgy. Sagpon, digdi.

An naconfiscar na cuarta na sari-sari an kantidad asin iba pang mga evidencia kan sugalan an dinara kan mga pulis tanganing gamiton na evidencia contra sa mga suspechado.

Mantang pig susurat an baretang ini pighahanda na an pagsangat kan asunto jusgado.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...