Lalaki, kinikilatan sa Talisay, todas

TALISAY, Camarines Norte--Dae na nakasalvar sa kagadanan an sarong lalaki na tinamaan nin kikilat kasoodma (Mayo 23), sa barangay Sto. Nino digdi.

Susug sa imbestigasyon kan mga awtoridad an victima iyo si Joey Aras y Lopez, na residente kan barangay na nasambit.

Sabi kan mga testigo sa pangyayari, si Aras nakatindong harane sa oma kasoodmang poco mas o menos ala 1:30 nin hapon.

Igwa suboot nin kaolay sa saiyang cellphone an victima kan biglang magkikilat asin magparakpatak.

An kuryente hale sa kikilat nagtulay pasiring sa saiyang kinakamugtakan, kaya nagsapo siya nin mga lapnos asin sulo sa saiyang lawas.

Sa paghuna na pwedeng pang maisalvar an saiyang buhay, dinara si Aras sa Our Lady of Lourdes District Hospital para ipabulong.

Huli kan grabeng kuryente na nagdalihig sa saiyang hawak, dae na kinaya kan victima na maka-agwanta an saiyang buhay.

Base sa report, binawian nin buhay an victima poco mas o menos alas 5:00 nin hapon kasoodma sa sinambit na pabulongan.--LDBJr/BICOLSTANDARD.COM

Start typing and press Enter to search