Friday, May 27, 2016

Kumbento kan Lagonoy natuprod kan kalayo


LAGONOY, Camarines Sur – Nagpasalamat si Arsobispo Rolando Tirona na mayong nakulgan sa nangyaring pagkasulo kan duwang eskalon na Kumbento kan banwaan na ini kan sarong aldaw.

Base sa ginibong pag siyasat kan mga bombero nagpoon an kalayo sa ika duwang eskalon kan edificio. Nagguikan an kalayo sa mga luma nang mga linya nin kuryente.

Mientrastanto, si Padre Toots Imperial, an Cura Paroko digdi nagsabi na narisa niyang nagpoon an kalayo pasado alas 5:30 nin hapon kan Mayo 25.

Ipigdeclarar kan mga bombero na na controlado na an kasulo alas 8:00 na nin banggui.

Nagluluwas sa report na maski na ngani igwa nin duwang mga bombero na nakadistino sa banwaan na ini, mayo sinda nin fire truck asin iba pang gamit sa pag ampat kan kalayo.
An duwang mga bombero naka distino sa Lagonoyo iyo sinda FO1 Dante Martillano asin FO3 Joan Rosales.

An nakatabang sa pagsigbo kan nag aarab-adad na kalayo iyo an mga bombero hale sa kataid na banwaan kan Goa asin Tigaon.

An natuprod na edificio iyo an Kumbento kan Saints Philip and James the Apostles na itinugdok 60ng taon na an nakaagi.

Sabi ni Archbishop Tirona, na nagdalaw tulos sa sinambit na simbahan hihingowahon guidaray na makapaguibo kan kabaeng na edificio.

Kun nuarin, mayong pang fecha an nasambit.

Sa katakod na bareta, an mga residentes kan banwaan na ini nangangapodan sa mga officiales kan saindang banwaan na sa orog na madaling panayon mag tarabang sa pag disponir nin fire truck asin dugangan an mga bombero.

Naghahadit an mga taga Lagonoy na kun mapapasipara an problemang ini mas dakulang peligro an saindang pig-aatubang.

Mantang pig susurat an baretang ini mayo pang tataramon asin pahayag hale mga oficiales lokal digdi. --LDBJr/BICOLSTANDARD.COM
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...