Iwal nin magbayaw sa Sorsogon, 1 an gadan

STA. MAGDALENA, Sorsogon-–Personal na iwal kan magbayaw an guinikanan kan kagadanan ni Armando Aroncillo y Galon, soltero, residente kan Sitio Balud, Brgy. San Isidro digdi.

Base sa pagsiyasat kan pulis, an suspecchado sa sa krimen iyo si Nicanor Fugnit y Galon, 62 anyos, balo, bayaw kan victima,asin dating miembro kan CAFGU.

Nagluluwas sa imbestigasyon na enot na inatraka ni Armando si Nicanor Fugnit y Galon sa laog kan saiyang residencia, mantang armado nin matarom na armas.

Paglaog pa sana kan victimang si Nicanor sa residencia ni Armando, pirang beses tulos niyang sinaksak an suspechado.

Maswerteng nakalikay asin nasagang kan suspechado an mga wating kan armas kan victima.

Mantang desidido an victima na kulgan si Armando, hidaling kinua kan suspechado an saiyang tirador, dangan tinirador sa angog an victima.

Sa puntong ini nag-arabot na an mga oficial kan barangay na nagprobar na sawayon an iwal kan magbayaw.

Dinagoso pa guiraray ni Armando si Nicanor asin sinaksak pa kan saiyang armas.

Alagad, naagaw kan suspechado an armas kan victima na iyo man sana an ginamit sa paggadan saiya.

Nagsapo nin mga rungas sa takyag asin iba pang parte kan saiyang lawas an suspechado.

Nagluluwas sa imbestigasyon kan mga awtoridad na may nagdadanay na dae pagkairintindihan an magbayaw, na iyong guinikanan kan krimen.

Dinakop kan mga pulis an suspechado asin yaon ngonian sa saindang hepatura.

Mientrastanto, an victimang si Armando pigdeclarar na mayo na nin buhay kan mag-abot sa Matnog Medical Hospital.--BICOLSTANDARD.COM

Start typing and press Enter to search