Bus, hinabasan sa laog kan terminal sa Naga City

NAGA CITY—Apesar na nasa sarong mahiwas na pampublikong lugar asin poco mas o menos alas 2 pa sana nin  hapon, sarong bus na nakaparada mismo sa laog kan Bicol Central Station an hinabasan kan dai pa nabibistong persona kan nakaaging Sabado.

Sa report na naguno kan BICOL STANDARD linaog kan suspechado an San Andres Liner passenger bus na may plate number na EAH 567 mantang mayo sa laog an driver kaini.

An driver nagpabistong si Alvin Trampe y Hirang, 30 anyos, asin residente kan Purok Bayabas, Brgy. Gubat, Daet, Camarines Norte.

Nagluluwas sa inisyal na imbestigasyon na nag-agi an suspechado sa ikaduwang bintana sa wala, asin kan makalaog, pigraot an kandado kan sarong drawer. Nalalay kaini an maabot sa P4,000 na cash.
Posible na an parahabas nagluwas sa pareho man sanang bintana, dugang pa kan mga autoridad.

Sa oras na sinusurat an baretang ini, pighahanap pa an suspechado tanganing maplantearan nin magkakanigong kaso asin marecover an nawawarang kwarta.

Maroromdoman na pirang semana pa sana an nakaagi, nagpahayag an Oficina Regional kan Philippine National Police na dakol na maray an mga reklamo nin panhabas sa Ciudad na nairerecord sa Naga City Police Office. Mala ta sa enterong region, ini an may pinakadakol kan nasambit na kaso sa laog kan nagkapirang bulan ngonian na taon 2015.—BICOLSTANDARD.COM

Start typing and press Enter to search