Friday, October 9, 2015

PAMBIHIRA | Siopao na may palaman shabu?

SORSOGON CITY—Siopao na may palaman nin shabu. Ini an pinakabagong paagi na pigprobaran paasiron ni Edgardo Garcia Trinidad para matundugan nin droga an adik na nalalangob sa Bureau of Jail Management and Penology (BJMP) sa Barangay Balogo digdi.

PAMBIHIRA | Siopao na may palaman shabu?
Hale sa Busina Bicol News Express

Si Trinidad, 45 anyos, may agom, drayber nin tricycle asin residente kan B2 L3 BNCC Compound, Cabid-an, pinugol kan guwardiya kan madiskubre na an saiyang darang apat na siopao may makadudang labot sa irarom.

Inapod kan guwardiya an opisyal sa nasambit na presohan tanganing reparuhon kun tano ta iba man an korte kan mainit-init pang siopao na gustong darahon sa preso.

An enot na deklarasyon ni Trinidad, an dara niya, special siopao, na an boot sabihon may palaman na sugok asin karne.

Pirang beses na pigpaturutigaya an masiram na kakanon sagkod sa malinaw na namansayan na espesyal man nanggad ini.

Binaak an sarong siopao. Biglang nagbulakog an mata kan guwardiya asin kan opisyal kan magluwas na an siopao may palaman, bakong sugok asin asado, kundi shabu na yaon sa plastic sachet.

Binanga si ikaduwa. Binaak si ikatulo, dangan si ikaapat.

Anas may palaman nin shabu.

Tulos nagpahimutik si Trinidad. “Dai ko man aram kun ano an laog kayan, ta an sabi sako, siopao.”

Isinaysay niya na duwang babae an nagsitsit saiya sa sentro kan ciudad tanganing ipadara an supot na may laog nin siopao asin sarong litrong soft drink.

Bilang gratificasyon, tinawan daa siya nin P20 tanganing maihatod sa carcel.

Tinugon siya kan mga babae na dadarahon niya an mirindalan sa sarong persona na an pangaran nakasurat na sa supot kan siopao.

An nakasurat na tataramon: TO: REY LAGATA FR: HONEY

Si Rey Lagata, sarong ditinido na may kasong pagbalga sa Comprehensive Dangerous Drugs Act of 2002. Nadakop siya sa sarong buy-bust operation.

Sabi niya, dai niya bisto kun siisay an nagpadara saiya, mala ngani halawigon nang panahon na mayong daa siyang dalaw.

An may dara kan siopao, inaresto kan mga autoridad, asin an pigtutubudan na shabu pinadara sa laboratorio nganing ugidon kun ano man nanggad an maputing kemikal na nasa laog kan plastic sachet na palaman sa siopao.—BICOLSTANDARD.COM
Share:

SPECIAL OFFER

SPECIAL OFFER

Featured Post

Chief Supt. Gardiola assumes as Bicol top cop

LEGAZPI CITY 7/10/17 (Bicol Standard)--Police Chief Supt. Antonio N. Gardiola has been installed as the Acting Regional Director of...