‘Hari nin Sinablay’ sa Naga City, dakop na

NAGA CITY –Mayo nang naginibo si Renato Capistrano y Ssierra, 29 anyos, soltero asin residente kan Magsaysay Avenue, Zone 1, Balatas, Naga City kan siya dakopon kan mga awtoridad sa sumbong ni Rex Victorio Hidalgo y Alcala, 55 anyos, kan Langka Street, Mac Mariano Village, Zone 3, Barangay Balatas, ciudad na ini.


Si Capistrano iyo an sinasahotan na imbuelto sa paghabon nin mga bagong linabahan na mga gubing, twalya, tamong, asin mga hanger, na an total na valor, labing P5,000.00.

Sabi kan nagreclamo, pinapahinuroan pa lang ninda an mga bagong linabahan na mga gamit na ibinugtak sa ibabaw kan lamesa sa atop kan saindang harong kan marisa na nawawara na an mga linabahan.

Tulos nagtarabang an mga miembros kan saindang familia sa paghanap.

Nareparo kan victima asin kan saiyang aki na pwedeng nagsalisi an parahabon.

An suspecha kan victima, nagsakat sa kudal kan kataid nindang lote, dangan nagsakat sa atop kan saindang harong an parahabon.

Mientras na pighahanap an mga nawawarang linabahan, naheling kan victima na an bitis kan lamesa yaon pwera kan bakanteng harong na kataid kan saindang residencia.

Huli kan siring na obserbasyon, nag-apod tulos sinda nin mga pulis tanganing magtabang na madakop an parahabon.

Arog kan saindang suspecha, an parahabon kan linabahan yaon mananggad nagpapahipli sa sinambit na lugar, kugos-kugos an mga nagtuturo pang mga bado asin tamong.

Dinakop si Capistrano asin dinara sa Police Station 2 para imbestigaran.—BICOLSTANDARD.COM

Start typing and press Enter to search