Saturday, October 31, 2015

Mga badil asin bala, tiklo sa Legazpi City

LEGAZPI CITY–Duwang armadong lalaki, na pareyong nagpabistong residentes kan Camalig, Albay an inarestar kan mga awtoridad, kan madakop sa saindang poder an mga armas asin bala.

Base sa sumbong sa pulis, sinda Lito Morada y Andes, taga Barangay Tagoytoy, asin Sanday Magdasoc y Morada, taga Barangay Mina, pareyo sa banwaan kan Camalig, Albay an sorpresang pinusasan huli sa pagbalga kan ley sa ilegal na pagbitbit nin badil asin mga bala.

Segun sa record kan mga imbestigador, si SPO3 Jeffrey Condes, CPAC4 Commander, kan Legazpi City police nakarecibe nin sumbong hale sa sarong residente na naheling niya an duwang mga suspechado na nakikipag-inoman sa saindang lugar, asin may hios nin armas.

An pigreport na incidente naheling sa Sitio Agna, Barangay Homapon sa ciudad na ini.

Nagparada nin team an pulis sa panginginot ni PSupt Joselito G. Esico, an hefe kan police digdi, asin naheling an duwang ipigrereclamo na igwa talaga nin sukbit na badil, mantang nakikipag-inoman sa harong ni Florentino Albaytar y Rosare, 27 anyos, soltero asin residente kan sinambit na lugar.

Kan dakopon an mga suspechado kan mga awtaoridad nakua sa saindang poder an minasunod na mga gamit: sarong itom asin silver na Norinco caliber 45 1911 na pistola na may Serial No. BCO1195-09-246 na may nakasulong na magazine na may pitong bala, sarong magazine na reserba na may pitong bala; sarong itom na Colt 1911 na calibre 45 na igwa nin nakasulong na magazine na may 6 na bala, sarong reserbang magazine para sa calibre 45 na may laog nin anom na bala; sarong hand grenade, sarong improvised na M16 (sumpak) na may sarongan, sarong tear gas, sarong spray sling pouch na may nakasurat na City Star 1991, sarong itom na sling pouch, limang bala para sa Cal 22; 2ng live ammunition para sa calibre 45; 3ng live ammunition para sa Cal 5.56; sarong live ammunition para sa 12 gauge na shotgun asin kantidad P59,000.00 na cash.

Tulos pigcomfiscar an nasambit na mga armas asin bala asin ngonian yaon sa poder kan mga awtoridad.

Mantang pigsusurat an baretang ini, pigpepreparar na an magkakanigong caso contra sa mga suspechado.

Paramientras, mas hararom na imbestigasyon an ginigibo kan mga nanunungdan para tugkadon an iba pang informasyon pwedeng may relasyon sa operasyon kan duwa na residentes kan Camalig, Albay. Si SPO1 Balonzo asin SPO1 Bataller an nagkakapot kan casong ini.—BICOLSTANDARD.COM
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...