Wednesday, September 23, 2015

PAMBIHIRA | Nagbakal nin “laptop,” an laog kalabasa

NAGA CITY –Anggot, pero nakangisi. Ini an mustra kan lalawgon ni Ana, taga Pamplona, Camarines Sur na nabiktima nin bagong klase nin budol-budol, sa Elias Angeles Street, digdi.

PAMBIHIRA | Nagbakal nin “laptop,” an laog kalabasa
BICOLSTANDARD.COM
An victima, kaibahan si saiyang amiga, nagsumbong sa hepatura kan pulis para iparecord na pinabakalan sindang laptop, na yaon pa sa laog nin bagohon na kahon, sa kantidad P3,000 sana.

Sabi ni Ana, kasubangong hapon, poco mas o menos alas 2:00, kaibahan niya an saiyang amiga, nagduman sinda sa Unitop para magbakal nin hanger asin iba pang mga gamit sa harong.

Paghangka pa lang ninda sa pwertahan kan tindahan, sarong lalaki an nagdulok sainda na may darang bagohon na kahon nin laptop.

Kiniblit kan lalaki an victima asin ipigtangro saiya an laptop, na barato sana an presyo. Bago, alagad, an  sabi kan nagpapabakal pinalusot sana ninda ini sa tindahan kan kagsadire.

Nagka-interes si Ana ta si saiyang lumang laptop nagraraot-raot na.

Mietrastanto, kan hinapot kan victima an nagpapabakal kun gurano an presyo, sinabihan siya na P5,000, pwede pang tawadan.

Nagtarawadan. Hastang nag abot sa presyong P3,000 na sana an valor kan gamit.

Sabi kan victima, tinuruhokan siya kan mga mata kan nagpapabakal na garong nahipnotismo kan mapungay na mga mata.

Pursigido si lalaki na naghihidale na i-dispachar an gamit.

Kaya, ilinaog na ini kan lalaki sa bag na dara kan victima.

Nagbarayadan sinda sa atubangan kan Regent Hotel.

Naghale na an mag-amiga, na nakahuyom ta nakabakal nin baratong laptop.

Alagad, kan maka-abot sinda kan saiyang amiga sa balyo kan tinampo, sa may mga tindahan nin mga dulceng pili sa Elias Angeles, binukasan ninda an kahon na may laog daa kan laptop.

Nagburarat an saindang mga mata kan maheling  na an laog kan carton kan laptop tulong pidasong binaraak na kalabasa.

Binalikan ninda an lalaki na nagpabakal. Alagad, mayo na siya sa lugar na nagkaigwa sinda nin transaksyon.

Nagparangisi an mag-amiga sa saindang kwentada na an valor palan kan kada pidaso kan kalabasa, P1,000.

An sabi kan pulis, iyo na ito an pinakamahal na kalabasa sa ciudad nin Naga.
—BICOLSTANDARD.COM. Pirming enot. Pirming bago.
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...