Wednesday, September 23, 2015

Astig na pulis kan Naga, nakadakop 2ng snatcher

NAGA CITY – Nagtitiwis nin mapulot na luha an mapupulang mga mata ninda Joey Albert Marquez asin Ruben Roy Lacena, pareyong residentes kan Barangay Bigaas, Calabanga, Camarines Sur kan sinda tringkahan ni SPO1 Norman Borbe, kan Police Station 3, kan Naga City Police Office, mantang piglalamag kan sarong estudiante kan Camarines Sur National High School.



An estudiante na si Linda (bakong tunay na pangaran) inagawan nin cellphone kan mga suspechado.

Sa pakipag-olay ki SPO1 Borbe, sinabi kan awtoridad na naghahalat siya kan saiyang aki sa atubangan kan eskwelahan kan makadangog nin kugagrit nin sarong babae na naghahagad nin tabang.

“Inagaw an sakuyang cellphone!” Ini an malagting na tingog ni Linda, mantang piglalamag an mga suspechado na pa-equis-equis an pagdalagan padulag sa victima.

An sabi ni Borbe, “instinct” nin sarong pulis an nagtulod saiya na lapagon dangan tringkahan an mga suspechado, apisar na sinda pareyo mga maskulado.

“Maray nganing mayo sindang darang mga armas. Napakinabangan ko si itinukdo kan sakuyang instructor sa arnis de mano kaya madali kong napaluhod si mga mararaot na tawo,” sabi ni Borbe.

Mientrastanto, an pig-agaw sa victima iyo an sarong baratohon na claseng celphone na pwedeng mabakal sa kantidad na P300 kun segunda mano.

An mga suspechado sinangatan na nin reclamo sa Oficina kan Procurador. (BICOLSTANDARD.COM) Report ni Boyet Paderes.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...