Mga salisi sa kotse, orog pang nagdadakol

NAGA CITY—Haros mayong nang patod an mga incidente nin panghahabon sa laog nin mga awto na nababayaan na nakaparada sa man laenlaen na barangay kan ciudad na ini.

Sa sumada kan report hale sa blotter kan police, pambihira sana an aldaw na mayo nin report dapit sa awto na pinasa an salming kan bintana kan mga nakaparadang awto, dangan enterong hinahabon an laog kan vehiculo.

An pinakabagong incidente iyo si nangyari ki Rina Reyes-Pio, sarong 50 na anyos na babae na nagparada kan saindang awto sa atubangan kan Twist Laundry Shol, sa No. 77, sa Barangay Concepcion, digdi.

Sabi sa sumbong kan victima, ipinarada niya si saiyang Toyota Innova na may plate No. WOI-562 sa
guilid kan tinampo para i-discarga si mga gamit.

Alagad, nawalat niya sa laog kan awto si saiyang ina na si Virginia PmasPio, 79 anyos an edad.

Kan magbalik na siya sa vehiculo nawawara na si saiyang handbag na may trademark na BNY, na may laog nin mga importanteng mga gamit.

Kabale sa mga nawara iyo an Credit Card sa banko, cheke na kantidad P13,000, ATM card, ATM Card na nasa pangaran ni Virginia Pio, bank book sa BDO, Metro Bank asin BPI, pitaka na may laog na
$200, cash na P7,000, man laen-laen na ID, Driver’s License, SSS ID, sarong cellphone na TD Iphone
4, saro pang cellphone na Nokia, asin iba pang mga importanteng documento.

Sabi kan victima tuyong binayaan niya si saiyang awto na dae nakasarado an pinto huli ta si saiya nganing ina yaon sa laog kaini.

Alagad, dae nagmangno an nasa laog kan vehiculo kan limason kan parahabas an gabos na pwedeng mapakinabangan, sa laog sana nin nagkapirang minutos.

Hasta sa pigsusurat an baretang ini, mayo pa nin giya an police kun pano ninda madadakop an mga responsable sa mga incidente nin “bukas kotse” digdi sa ciudad na ini. (BICOLSTANDARD.COM)

Start typing and press Enter to search