Dayuhan, binansukan saksak, gadan

PANDAN, Catanduanes— Dae na nakasalvar an buhay ni Renz Timothy Luistro, an 19 anos na taga Sucat, Paranaque, Metro Manila na temporaryong nag-eerok sa Barangay Cabo, sa banwaan na ini huli sa mga tama nin saksak sa saiyang lawas.

Segun sa report kan mga imbestigador, si Luistro nagadan sa atubangan kan residencia ni Susana Bien, sa kapareyong barangay.

Nagluluwas sa pagsiyasat na an victima asin an saiyang kasaroan na si Rima Galicia y Buban, maogmang nag iirinoman na kaibahan an saindang mga amigo.

Bako pang malinaw kun tano ta bigla na sanang binansukan nin kutsilyo an victima kan sarong lalaki na nabisto sa pangaran na Romeo Saldivar, 60 anyos, soltero, na residente man kan kapareyong barangay.

An suspechado marikas na nagdulag pagkatapos kan incidente.

Sabi kan mga awtoridad an ikinagadan kan victima iyo si tama kan matarom na kutsilyo sa saiyang daghan.

Pigprobaran pa man kuta kan saiyang mga pagiriba na idalagan sa Pandan District Hospital tanganing malapatan nin bulong.

Alagad, mayo na siya nin buhay, kan makaabot sa pabulongan, sabi kan nagasikasong doctor.

Pighahanda na an casong isasangat contra sa suspechado. (BICOLSTANDARD.COM)

Start typing and press Enter to search