Thursday, August 6, 2015

Harong sinalakat, P240,000 na cash nadara

BARAS, Catanduanes—Kantidad P240,000.00 na cash, duwang units nin laptop na may valor na P30,000.00 an kada saro; sarong unit nin SKK cellphone na kantidad P1,600 asin sarong reloj na an kantidad P900.00 an hinabas kan mga dae bistadong tawo sa sarong residencia sa Barangay Buenavesta digdi.



An mga victima iyo sinda Jose Todoc y Barrameda, 43 anyos, parabantay sa harong na sadire ni Amalia Pitt y Dalma, na Tesurera kan barangay na ini; Michael Rangel y Todoc, 20 anyos, soltero, buta, asin si Amalia Pitt Dalma, na anas taga digdi sa sinambit na barangay.

Apat an suspects sa sinambit na krimen.

Mientrastanto, sabi kan mga imbestigador, poco mas o menos alas 4:05 nin amay na aga kan Agosto 2, si Alex Ellano asin Romy Rebanco kan Barangay Buenavista nag-osip sa pulis na sinalakat an harong ni Amalia Pitt.

Nagluluwas sa sinambit na report na mantang si Jose Todoc asin an saiyang sobrino na si Michael Rangel an nagtuturog sa rest house na sarong bahay kubo, sa nasambit na residencia, an mga dae bistadong tawo an naglaog.

An 4 na suspechado dae nabisto kan mga victima huli kan saindang sulot na bonnet na nakatahob sa saindang payo asin pandok.

Enot na nagimata si Michael Rangel, alagad naenot si saiyang takot ta tibaad sinda kulugan kan mga suspechado.

Marikas nagkua nin straw an mga suspechado asin sa tahaw kan saindang pagkabigla, ginapos sinda Michael asin Jose kan mga suspechado.

Saro sa mga suspechado an nadangog kan mga victima na nagsabi na dae sana sinda matakot ta dae man sinda ma-aano. Tinaptap pa ngani suboot an saiyang abaga para asiguraron na kun dae sinda maglaban, dae man sinda kukulgan.

Mientrastanto, pirang minutos sana an nakalihis, na padulag na an mga parasalakat, nadangog ni Michael an saiyang amaon na si Jose na nagsasabi na igwa siya nin tama, ta siya sinaksak.
An kutsilyo nagtama sa tulak kan victima.

Idinalagan man tulos sa EBMC Hospital si Jose sa Virac, Catanduanes asin digdi siya pigbulong.
Mantang pigsusurat an baretang ini dae pa nabibisto an mga suspechado. Alagad an mga pulis naglansar nin follow-up operation.

An casong isasangat sa mga responsible sa krimen iyo an Robbery with Violence Against or Intimidation of Persons.—BICOLSTANDARD.COM
Share:

SPECIAL OFFER

SPECIAL OFFER

Featured Post

Sorsogon mayor, 2 others charged in Sandiganbayan

SORSOGON CITY 5/23/17 (Bicol Standard) -- Ombudsman Conchita Carpio-Morales has recommended the filing of criminal charges against Bu...