Thursday, August 6, 2015

Buy-bust ginibo sa Nabua, taga Sto. Domingo nadakop

NABUA, Camarines Sur—“Politika an rason kun tano ta ipigbabareta na lakop an droga digdi,” ini an marikas na sarahahotan ni Alkalde Delia Simbulan kan magbungkaras an report na nagiging paboritong lugar an banwaan na ini na bagsakan nin droga.

Mga nakua sa suspechado na si Sergio Magistrado y Madriaga sa buy-bust operation kan Nabua Municipal Police Station
(Retrato kan Nabua MPS)


Sa laog nin pira nang bulan, hasta ngonian, haros dae natatapos an semana na mayong nadadakop na nagbabariwas asin naggagamit nin shabu digdi.

An pinakahuring nadakop por medio nin buy bust operation iyo si Sergio Magistrado y Madriaga, 43 anyos, may-agom, taga Sitio Binuyuan, Sto. Domingo.

Si Magistrado haloy nang pigsusunod kan mga ahentes kan gobierno huli kan saiyang lantadan na pagkaimbuelto sa ilegal na pagbariwas kan ipigbabawal na bulong.

Mientrastanto, an ginibong buy-bust operation pigplano mismo kan mga tawohan ni Police Senior Inspector John Murray C. Cutaran, an OIC kan Municipal Police Station.

Katuwang kan pulis an mga mga tawohan kan PNP na hale sa Provincial Police Office (PPO) asin an mga ahentes kan Philippine Drug Enforcement Agency (PDEA).

Base sa informasyon kan dakopon si Magistrado nakua sa saiyang poder an transparent plastic sachet na may laog nin maputi na pulbos na pigsusuponiran na shabu.

Kan rekisahon pa kan mga awtoridad an saiyang lawas may nakua pang 10ng transparent plastic sachet kan bawal na bulong, na nasasaray sa saiyang bulsa.

An mga nagconducir kan buy-bust igwa pang nakuang stainless na gunting, asin cellphone.

Mismong si PSInsp. Cutaran an nagconfirmar sa BICOL STANDARD kan enot na nakaolay siya na igwa na sinda nin listahan kan mga tawo na naggagamit asin nagbabariwas nin droga sa banwaan na ini.

An lista kan mga pangaran naghale sa mga oficiales nin mga barangay asin an saindang mga assets na pirang bulan nang nasa higot na pag-usisa kan problema.

An target na ngonian kan mga ahentes kan gobierno iyo an nagkapirang pangaran nin mga tawo na sinasabing dayupot o harane sa mga oficial kan gobierno, kaya dae sinda nadadakop.

Si Mayor Simbulan asin mga miembros kan lokal na gobierno, hinahanapan nin programa tanganing mapuho an pagkuriyat kan ilegal na droga.—BICOLSTANDARD.COM
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...