Thursday, August 20, 2015

Marijuana, uso pa sa Nabua

NABUA, Camarines Sur—Maigot na an kampanya kan mga pulis contra sa mga nagbabariwas nin ipinapangalad na droga sa banwaan na ini.

Retrato hale sa Nabua MPS
Segun sa intrevista ki PInsp John Murray Cutaran, hefe kan pulis digdi, tiniripon na ninda an gabos na informasyon na pwedeng makatao sainda nin guiya kun sisay an mga imbuelto sa pagpabakal nin shabu, na lakop nang entero sa banwaan.

Sinabi ni Cutaran na dakulang tabang sa saindang kampanya si mga itinaong detalyes kan mga oficiales kan mga barangay na iyong nag-oosip kan mga pangaran kan mga pushers, asin an mga parokyano ninda.

An pinakabagong nadakop kan pinagsararong operasyon kan pulis asin Philippine Drug Enforcement Agency (PDEA) iyo si Ronald Sales y Pelonia, 30 anyos, taga San Juan, sa banwaan na ini.

Si Sales tunuklo kan mga awtoridad sa sarong buy-bust operation, mantang nagpapabakal nin shabu sa sarong paon na parabakal nin droga.

Kan siya dinakop kan police team, nakua sa poder ni Sales an medium-size na plastic sachet na may laog nin maputing pulbos, na pigtutubodan na shabu.

Afuera kan shabu, may nakua pa saiyang mga pinaalang na dahon nin marijuana, na ibinugtak sa plastic sachet.

Mientrastanto, sabi sa entrevista kan BICOLSTANDARD, si Sales haloy nang pigsusunod kan mga asset kan pulis huli kan saiyang lantadan nang pagpabakal kan bawal na bulong.

An iba pang mga nakua sa poder kan suspechado iyo an gunting, apat na pidasong cuarta na mananggatos pesos na iyong ginamit na buy-bust money.

Sa piggibong pag imbentaryo kan mga nakua sa suspechado, naging testigo iyo si Glenda Bearis, bilang representante kan media, Ramon Nagrampa, representante kan Department of Justice, asin si
Punong Barangay Ramiro Basilio L. Fortuna III, kan San Juan digdi.

Sinabi ni Cutaran, seguido an saindang operasyon contra sa droga. Kan nakaaging semana, duwang personas an saindang nadakop asin ngonian, nahulog na sa saindang kamot si Sales.

Pigconformar ni Cutaran na an guira kan mga paratindang droga hale sa banwaan nin Bula, Camarines Sur.—BICOLSTANDARD.COM. Pirming enot. Pirming bago.
Share:

Featured Post

Naga City shabu dealer slapped with life term

NAGA CITY 11/22/17 (Bicol Standard) -- A man caught selling Php200,000.00 worth of shabu inside a room of Villa Caceres Hotel in 2015 w...