Wednesday, August 12, 2015

50 kilos na carneng pasa-pasa, shabu naconfiscar sa Donsol

DONSOL, Sorsogon—An original na plano kan mga awtoridad iyo an pagdakop kan duwang personas na suboot may darang carne nin sirang pasa-pasa (manta ray) na prohibidong dakopon, alagad si mga tawong pigbabantayan ninda nakuanan pa nin pigbabawal na droga.

Pasa-pasa o manta ray
Retrato kan donsolwhaleshark.net
An mga suspechado iyo sinda Rodolfo Casada Rengalota, Jr., 36 anyos, taga Barangay Bacong, Ligao City asin Renato Piere Romano, na residente kan Barangay White Deer, Jovellar, Albay.
Base sa record kan pulis, alas 7:20 nin aga kan Agosto 11, si Insp. Joel C. Trinanes, an Acting Chief of Police digdi, nakarecibe nin informasyon na igwang darang carne kan pasa-pasa an mga suspechado.

Sinda, sabi kan informante, nakalunad sa owner-type jeep na may plate number CAN 730, hale sa Barangay Tres Marias, sa banwaan na ini, asin pasiring sa direction kan Jovellar, Albay.

Pagkarecibe kan informasyon, nagpadara nin team an pulis sa pamamayo ni PO3 Ruel C. Renolayan, dangan nagbugtak nin checkpoint sa tinampo kan Barangay Poso, sa banwaan na ini.

Dae naghaloy, alas 7:30 nin aga nag-agi na an owner-type na jeep kaya pinapondo kan mga awtoridad, dagos pigconfiscar an 50 kilos na carne kan pasa-pasa.

Mientrastanto, durante kan guinibong pagrekisa kan iba mga darang gamit, asin sa body search sa mga suspechado, sa sarong bag na dara ni Rodolfo Casada Rengalonta, Jr., nakua an minasunod na mga pigpapangalad kan ley: sarong sachet nin transparent plastic na may laog nin maputing pulbos, na pigtutubodan na shabu, 19ng sadit na plastic sachet, na may laog man nin maputing pulbos, 7ng pidasong man laen-laen na clase nin lighters, sarong gunting, improvised tooter, nail cutter, nipper asin aluminum foil.

An nasambit na mga gamit pigtutubodan na pig-uusar sa paggamit nin shabu.

Huli kan siring na pangyayari, an mga awtoridad digdi sinangatan nin caso criminal an duwang suspechado sa pagbalga kan Section 10 asin 11 kan Republic Act 9165 o an Comprehensive Dangerous Drugs Act pf 2002, asin Republic Act 8550, an ley na nagbabawal sa pag dakop nin pasa-pasa.—BICOLSTANDARD.COM Pirming enot. Pirming bago.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...