Saturday, August 8, 2015

“Basag Kotse” suspect, nadakop sa Naga City

NAGA CITY –Naturuhokan mismo kan mga mata kan security guard na si Jefferson Gutierrez y Bio, taga La Purisima, Quipayo, Calabanga, Camarines Sur an sarong lalaki na pigraraot an salming kan awto na nakagarahe sa atubangan kan Sir Edward Hotel sa Barangay Penafrancia digdi.


Si Gutierrez, nagtatrabaho bilang security guard kan companiyang AMS Press, na may oficina sa kapareyong lugar kan maagihan kan saiyang mga mata an sarong lalaki na ginigibo an pagraot kan windshield kan awto.

An vehiculo, sarong Toyota SUV na may Plate No. AFA 7305. An may sadire kan sinambit na awto iyo si Roy Satuito y Maz, na taga San Juan Subdivicion, Barangay Malaruhatan Lian, Batangas.

Mientrastanto, si Jaime Martinea y Canave, taga 128 Barangay Penafrancia digdi nagpaisi man sa mga awtoridad na an saiyang Toyota Tamaraw FX na may Plate No. UBX 499 rinaot man an windshield.

Nagtutubod si Martinez na an nagraot kan windshield kan saiyang awto na nakagarahe sa atubangan kan Marikina Shoe Exchage, iyo an pareyong suspechado.

Pigbisto kan mga awtoridad an suspechechado na iyo si Jimmy Gachara y Gonzalez, 21 anyos, soltero, taga Barangay Dinaga.

An casong isasangat contra sa suspechado iyo an Malicious Mischief.

Sabi kan mga imbestigador kan pulis, sa nakaaging pirang semana sana, kadakul nang mga awto an naging victima kan arog kaining modus operandi.

Alagad, si Gonzalez pa sana an pinakaenot na nadakop na posibleng saro sa mga imbuelto sa krimen. —BICOLSTANDARD.COM Pirming enot. Pirming bago.

Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...