Nawarang truck na cargado nin azucar, nakua sa Buhi

BUHI, Camarines Sur –Yaon na ngonian sa poder kan pulis sa banwaan na ini nawawarang truck na cargado nin sinakong azucar na hale sa Partido Ricemill sa banwaan kan Pili, Camarines Sur.

Nawarang truck na cargado nin azucar, nakua sa Buhi
Kua ni Melvin Machado
BICOLSTANDARD.COM
An mga imbestigador nagsabi na an truck, na Izuzu Wing Van na may plate number WNF 912 nakuang inabandonar sa Barangay Sta. Justina kan mga dae nabistong mga tawo.

Idinagdag kan pulis na an sinambit na vehiculo iyo si ipigbandillo kan pulis sa Milaor na nawawara.
Mientrastanto, kan marecibe ni Punong Barangay Consolacion Llagas y Tabumpama an informasyon dapit sa abandonadong truck, tulos pinaisi ninda an pulis.

Si PI Leonido B. Belleza, an deputy Chief of Police digdi tulos nagpasiring sa sinambit na barangay, para helingon an truck.

An vehiculo igwa nin chasis number CXM71V- 3001071 asin motor number 10PDI-751486, color puti asin pula, asin modelo kan 1999.

An rehistradong kagsadire kan vehiculo iyo si Caparros, Alfredo G. na taga Barangay Maunlad, Gumaca, Quezon.

Nagluluwas sa nagunong report kan mga awtoridad na an truck fuerzahan na hinabon nin mga
armadong tawo, na nagtutok nin armas sa nagmamaneho sa parte kan National Road sa pag oltanan kan Milaor- San Fernando-Pamplona, Camarines Sur.

An sinakong azucar na carga kan truck may total na kantidad na P1,025,000.

Dadarahon kuta an sinambit na cargamento sa Gumaca, Quezon.

Hasta sa presente an sinambit na truck yaon pa sa poder kan pulis sa banwaan na ini. – Report ni Melvin Machado/BICOLSTANDARD.COM

Start typing and press Enter to search