Wednesday, July 1, 2015

7ng drug users sa Naga, dinarakop

CIUDAD NIN NAGA—Mayo nang naginibo an pitong mga paragamit nin shabu kan sinda sarabay na mataraka dangan arestaron kan mga tawohan kan Naga City Police sa tabang asin coordinasyon sa Philippine Drug Enforcement Agency Regional Office V.

Shabu
File photo hale sa NCPO
Poco mas o menos alas 12:30 kasubagong mag-omagahon (Julio 1), sa Imperial St., Barangay Dayangdang, nadakop man guiraray si Ramon Sarmiento y Mendoza, na haloy nang nasa watch list na paratinda asin paragamit nin droga.

Segun sa oficial na report kan pulis, si Sarmiento nakumbensir ni PO2 Randy B. Basallote,sarong pa-on kan mga awtoridad, na magpabakal saiya kan ipinagbabawal na droga.

Segundo sana an nakalihis pagkatapos na mangyari an transaksyon, si Ramon Imperial, na suspechado man kan mga awtoridad, an duminalagan palaog sa saindang residencia.

Sa marikas sa ralamagan kan mga tawohan kan gobierno, kaibahan an representante kan media, Department of Justice, asin oficial kan barangay, natiempohan na inabotan an pitong mga lalaki na nasa katahawan kan drug session, gamit an pigsasaramaan na shabu.

Base sa listahan kan pulis, oya an mga nadakop sa buy-bust operation: Ramon Sarmiento , alyas Ramoning, 53 anyos, soltero, taga Imperial St,  Dayangdang; Isaias Flores y Merillo, 41 anyos, may agom, taga San Miguel St., Barangay Mabulo; Elizer Layosa y Cantor, 38 anyos, may agom, taga Arana St. Barangay Sta Cruz; Rodel Cleto Francisco, 40 anyos, may agom, taga Zone 1, San Jose, Bombon; Rodante Bautista y Nodado, 35 anos, may agom kan 12-4, Zone 3 M. Castro St. Barangay Tinago; Ruel Bautista y Nodado 26 anyos, soltero, kan 12-4 Zone 3, M. Castro St. Tinago; asin Sheryll Watson y Buella, 29 anyos, soltero kan 11-C, Ocampo St., Barangay Bagumbayan.

Nakua sa mga suspechado an mga sachet nin ipigbabawal na droga, aluminum foil, tooter,disposable lighter, gunting, asin mga cuarta, na hale sa mga dinarakop na naggagamit kan bawal na droga.

Paghale sa lugar kun sain nadakop an mga suspechado, dinara sa hepatura kan pulis para i-proceso an pagsangat sainda kan magkakanigong caso sa pagbalga kan Republic Act 9165 na mas bisto sa apod na Comprehensive Dangerous Drugs Act of 2002.

Saro sa mga nadakop sa drug session an suboot empleado kan City Hall, asin an saro aki nin oficial sa barangay.

An liderato kan pulis digdi nagpahayag na ipapadagos ninda an pagdakop kan mga tawo na imbuelto sa ilegal na droga.

Sabi sa report, an mga oficiales kan mga barangay an naggibo nin paagui para ipaabot sa attention kan mga awtoridad an mga pangaran kan mga paragamit, orog na an mga nagririgaton kan nasambit na ipinapangalad na bulong.—BICOLSTANDARD.COM
Share:

SPECIAL OFFER

SPECIAL OFFER

Featured Post

Masbate's Villalobos Gang leader falls

MASBATE CITY 8/15/17 (Bicol Standard)--The alleged leader of Villalobos Gang, Ruel Villalobos y Amo, was neutralized in an anti-illegal...