CamSur PNP, No. 1 sa pagserve nin Warrants of Arrest

CIUDAD NIN NAGA— Tinawan nin dakulang pag-omaw an mga tawohan kan Detective and Warrant Section kan Philippine National Police (PNP) sa Camarines Sur Police Provincial Office (CSPPO) huli kan saindang dakulang contribusyon sa pagdakop kan mga persona na may inaatubang na mandamiento de aresto.

CamSur PNP, No. 1 sa pagserve nin Warrants of Arrest
An sinambit na grupo na pinapamayohan ni Senior Supt. Walfredo G. Pornillos, an Officer-In-Charge kan PNP Camarines Sur nakakua kan pinakahalangkaw na grado asin pigdeclarar na numero unong
Police Provincial Office sa performance.

Sa lindong kan liderato ni Senior Supt. Pornillos, dinaog kan CSPPO, an 7ng iba pang provincial asin city police offices sa Bicol sa Service of Warrant Efficienty (SWE).

Nakua kan Camarines Sur PPO an markang 130% para sa primerong tulong bulan kan taon na presente.

An nag gawgaw sainda kan sinambit na honra iyo si Police Chief Superintendent Victor P. Deona, Regional Director kan PNP Bicol.

Segun ki Deona, an maigot na pagtrabaho kan mga pulis sa Camarines Sur pagpatunay kan makusog na campanya kan mga awtoridad tanganing i-atubang sa jusgado an mga tawo na may mga caso tanganing bistahan.

Maroromdoman na nasa Camarines Sur man an kadaklan sa top ten na police station sa Bicol sa pagpapaotob kan Target Output Policy. Alagad, yaon man digdi an duwa sa mga police station dai nakacomple sa hinahagad na target, an Tinambac asin Pasacao, sa laog man guiraray kan Febrero hasta Abril ngonian na taon.—BICOLSTANDARD.COM

Start typing and press Enter to search