‘Bukas kotse,’ uso sa Ciudad nin Naga

NAGA CITY—Sarong maisog na operasyon an gigibohon kan pulis para madakop an sisay man na imbuelto sa serye nin krimen, orog na an nag-uuso ngonian na “bukas kotse" digdi.


Sinugo ni Senior Supt. Narciso Domingo, OIC kan Naga City Police Office an saiyang mga tawohan na adalan na maray asin darakopon an mga imbuelto sa pagraot kan mga bintana kan mga vehiculo para mahabon an mga importanteng kagamitan sa laog.

Kan nagtalikod sanang pirang aldaw, surunod-sunod an operasyon kan mga parahabon.

An pinakabagong pigreport sa awtoridad an pagpasa kan salming sa bintana kan awto na sadire ni Eric Divinagracia, na taga Cadlan, Pili.

Sabi sa report, an awto ni Divinagracia na Urban nakaparada sa atubangan kan sarong tindahan sa Penafrancia Ave.

Nariparo na lang ni Divinagracia na an bintana kan awto rinaot na asin hinarabon pa an mga importanteng gamit kabale an mga gubing, gadgets asin iba pa.

An mga nag-iimbestigar nagtutubod sa estilo kan mga parahabon, pwedeng mga bagohan pa sana sinda.

Mientrastanto, sa separadong pakikipag-olay kan BICOL STANDARD, sinabi ni Senior Insp. Dennis San Juan, hefe kan Station kan 1 digdi, na an mga tawong layas iyo an pwedeng nakakaaram sa harabonan.

Afuera kan awto ni Divinagracia, tulong iba pang vehiculo an tinirada kan mga pasaway kan Julio 19.

Kabale sa naging victima iyo si Pio Samonte y Dancalan, na rinaot man an bintana kan saiyang awto.

Nakua kan parahabon si kantidad P2,000 na ginawgaw kan suspechado hale sa sulong-sulong kan awto. An iba pang mga saradit na gamit linimas pa kan parahabon. Yaon ini sa report kan Police Station 2.

Saro pang incidente an nangyari sa Bagumbayan Norte kan kapareyong fecha.

An awto ni Wilfredo Prilles y Brinas, empleado kan City Hall, mantang nakaparada sa atubangan kan simbahan kan Jehovah’s Witness an pinakiaraman kan mga parahabon.

Segun ki Prilles, si saiyang Nissan Gradia Livina, an pinasa an bintana, sa toong parte.

Kan makalaog sa vehiculo,inubos man kan pusuanon na parahabon an mga importanteng laog kan awto, arog kan mga ATM card, credit cards, driver’s license, pasaporte asin dakol pang iba.

Mientrastanto, sa St. Jude Village, Concepcion Grande, Naga City, si Pedro Nacional, nagreport sa mga awtoridad na naheling niya an sarong lalaki na nasa laog kan saiyang Tamaraw FX, na naka garahe sa tongod kan saindang apartment.

Kan ranihon ni Nacional an lalaki, bigla ining nagdulag, asin naglunad sa sarong puting motorsiklo.
Binonot ni Nacional an saiyang badil asin ipigpuntariya sa suspechado, alagad, padagos ining nagdulag pasiring sa Almeda Highway.—BICOLSTANDARD.COM

Start typing and press Enter to search