“Bukas awto” nag-atake na naman sa Naga City

NAGA CITY—Saro na naman na casong “robbery” an ipinaabot sa kaaraman kan mga pulis na nangyari sa pag-oltanan kan oras na alas 7:45 hasta alas 8:00 nin banggui sa Elias Angeles St. digdi.



An victim iyo si Jadi Miguel Castroverde y Ocampo, 18 anyos, soltero asin nag-eestar sa No. 43 Kamagong St., Mariano Village, Barangay Balatas.

Sabi sa guinibong pagsiyasat kan mga awtoridad kan sarong aldaw, mantang binayaan na mayong bantay na awto kan victim na Hilux pick-up, tuyong pinasa an salming sa enotan kan vehiculo, dangan hinabon an mga importanteng mga gamit sa laog.

An vehiculo naka rehistro pa sa original na kagsadire kaini na Media Scape Inc., na taga 6752 Ayala Avenue, Makati City, asin may plate number na PO1829.

Durante kan guinibo an pag-imbentaryo kan mga nawarang gamit sa laog kan vehiculo, hinabon an sarong color blue na bag na may laog nin duwang padis nin hikaw na may kanditad na P3,000; sarong bracelet na may valor na P7,000; baby bracelet na an kantidad P4,000, duwang kwintas na may pendant na kantidad P8,000.

Mayong nakaheling kan incidente.

An mga imbestigador padagos pa ngonian na nagsisisayat sa paglaom na mabisto an mga pusikit na parahabas nin mga gamit sa nakaparadang awto digi.

Susug sa report kan pulis, kan nagtalikod sanang bulan, nagkapirang mga arog kaining krimen an nangyari, na an modus operandi iyo an pagdistroso kan salming kan nakaparadang awto, asin paghabon kan gabos na pwedeng pakinabangan sa laog kan vehiculo.

Nagpahayag an mga imbestigador na an siring na krimen pwedeng kagibohan nin nagkapirang mga pusuanon na parahabas na an pinakakursunada iyo an mga awto na nakaparada sa guilid kan tinampo na mayo nin bantay.

Nagpatanid an mga atoridad sa mga may sadire nin vehiculo na pasegurohon an mga gamit, orog na kun iwinawalat sana an awto sa sarong lugar na madaling malaog kan mga pusikit na mga criminal.—BICOLSTANDARD.COM

Start typing and press Enter to search