Abogado 3ng beses binadil, dae tinamaan

SAN JOSE, Camarines Sur—Maswerteng dae tinamaan kan bala si Abogado Juan C. Paano, Jr. II asin an saiyang pinsan na si Joel Paano Lucero, Jr., kan sinda tulong beses na badilon kan suspechadong si Juan Tianes Dacer kan sarong aldaw.


Base sa ginibong imbestigasyon kan mga awtoridad, an duwang victima nagbisita kan oma na sadire ni Sanita Fria para maghanap nin matrabaho sa pagliwanag kaini.

Mientrastanto, pag-abot ninda Atty. Paano, Jr. II asin Joel Paano Lucero, Jr. sa lugar, nagngalas sinda ta an oma na dapat liwanagon pa sana igwa nang tanom na paroy.

Segun sa report, si Marcelo Panagan iyo an nagtanom.

Huli kan bagay na ini, nagkaigwa nin diskusyon sinda Paano Jr. II asin si Panagan.

An sabi mayo nin derecho si Panagan na magboot sa daga, orog na an pagtanom nin paroy, na dae siyang pagtugot, ta siya an katiwala o encarcado kan oma.

Pirang minutos sana an nakalihis, an sobrino ni Panagan na si Dacer nagdadaguso na armado nin dae madeterminaran na calibre nin badil.

Dangan hinimunta asin pinaputokan nin tulong beses sinda Paano, Jr. II asin si Lucero, Jr.

Huli suboot sa maluyang pulso sa gamit kan badil, mayo ni sarong bala an nagtama sa mga victima.
Pagkatapos tulos kan incidente an suspechado marikas na nagkutipas parayo, para magdulag.

Marikas na nakaabot an mga pulis na pinanginotan ni SPO4 Lino Valencia Obias, an Chief Investigator, kaibahan si PO3 Bobby Jallores Corono, PO2 Salvador Rentoria, Jr. asin PO2 Jamil Santilecis, tanganing maggibo nin imbestigasyon.

Tulos nadakop an mga suspechado.

An mga victimang sinda Paano, Jr. II asin Joel Lucero pareyo taga Barangay Kinalansan digdi.
An suspechadong si Juan Tianes Dacer taga Tabgon, Goa, mientras na si Marcelo Panagan, taga Barangay Kinalansan, digdi.

Kan oras na sinusurat an baretang ini, pighahanda na an caso criminal contra sa mga suspechado.—BICOLSTANDARD.COM

Start typing and press Enter to search