Tuesday, July 28, 2015

3 binadil sa Naga; 1 gadan, 2 irido

NAGA CITY –Pugol na ngonian kan mga awtoridad an saro sa tulong suspechado na nag badil, gadan sa sarong gurang na babae asin duwang iba pa, sa krimen na nangyari sa Zone 5, Barangay Penafrancia, digdi.

Sa intrevista kan BICOL STANDARD, an itinukdo kan testigo na responsible sa krimen iyo si Allan Asay Baracenas, taga Barangay Del Carmen Del Rosario, Minalabac, Camarines Sur.

An binadil iyo si Aurora Barcena y Nate, 62 anyos. Yaon siya sa laog kan saindang tindahan na an pangaran Kana Buraot Store, na putokan kan suspechado.Dinara pa man kuta siya sa Mother Seton Hospital, alagad pig declarar na mayo na nin buhay.

Sabi sa informasyon, an suspechadong si Baracenas dati nang ipig laog sa preso sa Tinangis Penal Farm sa casong may relasyon sa droga.

Afuera ki Barcena, binadil pa kan suspechado si Ralph Rabano y Octangvo, a.k.a Rap-Rap, 30 anyos an edad, taga San Vicente, Milaor, Camarines Sur, asin si Gemma Flores, 16 anyos.

Si Rabano iyo si naheling na kaolay kan victima sa atubangan kan nasambit na tindahan.

An mga miembros kan familia ni Barcena nagsabi na mortal si tama nin bala sa daghan kan victima, na iyong naging dahilan kan saiyang kagadanan.

Alagad afuera kan tama sa daghan na nagderecho sa puso an bala igwa pang duwang bala na nagtama saiya.

Sa parte ni Ralph Rabano, na mas bisto sa apod na Rap-Rap,tinamaan man ini nin tulong bala. An saro sa tulak, may tama sa braso asin abaga.

Pagkatapos siyang badilon, natumba siya sa atubangan kan tindahan asin nag-sagin sagin na gadan na.

An pahayag kan testigo, an kaiwal kan suspechado iyo si Rabano.

Alagad nagsasaway si Barcena, kaya pinuntariya siya kan armas dangan binadil nin tulong beses.

An testigo sa pangyayari iyo si Michael Ebansa y Tagalog, na yaon man sa Kana Buraot Store, an pinangyarihan kan krimen.

Nakua sa lugar kan krimen an 7ng capsula nin bala asin 3ng “slug” kan bala.

May ibang mga anggulo na pig iimbestigar pa kan mga pulis na habo pa ngonang ipabuyagyag sa publico, mantang nagpapadagos an pag siyasat.

Hasta ngonian pig hahanap pa kan mga awtoridad an duwa pang pag-iriba ninda sa krimen.

Pagkatapos kan krimen marikas na nagdurulag an tulo pasiring sa dereksyon kan San Felipe.

Mientrastanto, sinugog an guira kan suspechadong krimenal pasiring sa saindang residencia sa banwaan kan Minalabac.

Si PSI Josefa Caparozo, an hefe kan police station No. 3, sa Barangay Penafrancia pinanginotan an team nin mga pulis pasiring sa Barangay Del Carmen Del Rosario, Minalabac, Camarines Sur asin nadakop an suspechado.

Nadakop si Allan Asay Baracenas alas 11:50 nin banggui kan Julio 26).

Kinasohan nin “murder” asin 2ng frustrated an suspechado na detinido ngonian sa hepatura kan PNP. An duwa pa niyang kaibahan na pighahanap pa sagkod ngonian.—BICOLSTANDARD.COM
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...