Tuesday, June 2, 2015

Paradukot sa Naga, dakop kan seyku

CIUDAD NIN NAGA—Makusog an boot kan victima na nakipagtabangan sa sarong security guard para madakop an paradukot na nag-ooperar sa tungod kan Master’s Square Department Store sa Barangay Abella digdi.

Base sa imbestigasyon kan pulis, sarong taga Sitio Baras, Malitbog, Minalabac, Camarines Sur na nagpabistong si Junior Sola y Punto, 21 anyos, soltero, naging victima kan suspechadong si Wilson Asico y Gasis, na taga Gogon, Camaligan, Camarines Sur.

Sa pahayag ni Sola, suboot siya naglalakaw sa may tungod na kan Master’s Square Department Store kan marisa niyang linaslas na si saiyang darang sling bag na may laog na cellphone.

Tulos niyang pigreparo an laog kan saiyang bag asin naheling na marikas na padulag si nagbundol saiyang lalaki, kan matorohokan kan saiyang mata.

Huli kan siring na sitwasyon marikas na nag-agap saiya an security guard na an pangaran Jacutina na miembro kan Spearhead Security Agency asin si PO1 Aquinaldo kan PNP Naga.

Narecover ninda si dinukot na Nokia 360, na nasa color itom asin brown na jelly case na sadire ni Sola.

An cellphone, sabi kan victima may kantidad nin P8,300.

Durante kan imbestigasyon, positibong itinukdo ni Sola sa mga awtoridad an suspehasong si Asico na iyo si nagpaparasunod saiya, antes niyang maaraman na dinukot na palan si saiyang gamit.

Si Asico sasangtan nin caso sa oficina kan Procurador kan Ciudad nin Naga. —BICOLSTANDARD.COM Pirming enot. Pirming bago.
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...