Negociante inagawan P500,000 sa Libmanan

LIBMANAN, Camarines Sur—Mayong naginibo an negocianteng si Maria Embudo, 40 anyos, barangay kagawad kan Malinao kan hipaan sinda nin anom na mga lalaki, dangan pirit na kinua si dara niyang kantidad P500,000 na cash.

An incidente nangyari sa Barangay Pag-Oring, mantang an victima kaibahan an driver kan Honda Wave motorcycle na saindang piglulunadan, hinipaan kan mga armadong lalaki dangan pirit na kinua an bag na may laog kan cuarta.

Ipinahayag kan victima na afuera kan cash pirit pang inagaw saiya an saiyang cellurar phone, duwang pidasong 18-carat na bulawan na kwintas, mga llave, ATM cards asin passbook.

Sa parte kan driver kan motorsiklo, inagaw pa kan mga holduppers si saiyang pitaka na may laog nin P700 asin licencia sa pagmaneho.

Mantang nasa tahaw kan grabeng paghadit, mayong naginibo an mga victima kundi itao an gabos na hinagad kan mga armadong lalaki.

An incidente nangyari poco mas o menos alas 5:45 nin hapon sa Barangay Malinao digdi.

Mayo pa nin ideya an mga victima asin si mga imbestigador kun sisay an mga lalaki na nagbiktima sainda.

Nagtutubod an mga nag-iimbestigar na haloy nang inadalan an rota kan negocianteng si Embudo kaya malinig si ginibong pagplano kan saindang operasyon.

Hasta sa oras na sinusurat an baretang ini blanko pa nin evidencia an mga awtoridad, na nagpapadagos kan saiyang pagsiyasat.— BICOLSTANDARD.COM Report ni Oscar Esmenda

Start typing and press Enter to search